Mehnat kodeksining (MK) 154-moddasida, ish beruvchi oʻzining moliyaviy holatidan qat’i nazar, хodimga bajargan ishi uchun haqni belgilangan mehnat haqi shartlariga muvofiq toʻlashi shart, deb belgilangan. Shuningdek qonunchilikda turli nafaqa, qoʻshimcha toʻlovlar, ustamalar ish beruvchi tomonidan toʻlanishi kerakligi belgilangan. Lekin davlat bayramlari munosabati bilan toʻlanadigan mukofotlar ragʻbatlantirish choralari hisoblanadi va ushbu toʻlovlar ish beruvchi tomonidan toʻlanishi majburiy boʻlgan toʻlovlarga kirmaydi. MKning 153-moddasiga koʻra, mukofotlar, qoʻshimcha toʻlovlar, ustamalar, ragʻbatlantirish tarzidagi toʻlovlar jamoa shartnomalarida, shuningdek ish beruvchi tomonidan kasaba uyushmasi qoʻmitasi bilan kelishib qabul qilinadigan boshqa lokal hujjatlarda belgilanadi. Agar bunday toʻlovlar jamoa shartnomasida (korхonaning boshqa lokal hujjatlarda) koʻzda tutilmagan yoki korхonaning moliya imkoniyatlaridan kelib chiqib toʻlanishi belgilangan boʻlsa, bu holda ish beruvchi mazkur toʻlovlarni toʻlash imkoniyati boʻlmay qolsa, uni javobgarlikka tortib boʻlmaydi. Korхona bosh hisobchisi faqatgina ish beruvchining buyrugʻini bajaradi. Agar u buyruqni bajarmasa, unga nisbatan ish beruvchi tomonidan intizomiy jazo qoʻllanilishi mumkin.

Yuqoridagilarni inobatga olib, kasaba uyushmasi qoʻmitasi mukofot pulini toʻlash imkoniyatini topish boʻyicha ish beruvchi bilan kelishib olishini tavsiya qilamiz.