Меҳнат кодексининг (МК) 154-моддасида, иш берувчи ўзининг молиявий ҳолатидан қатъи назар, ходимга бажарган иши учун ҳақни белгиланган меҳнат ҳақи шартларига мувофиқ тўлаши шарт, деб белгиланган. Шунингдек қонунчиликда турли нафақа, қўшимча тўловлар, устамалар иш берувчи томонидан тўланиши кераклиги белгиланган. Лекин давлат байрамлари муносабати билан тўланадиган мукофотлар рағбатлантириш чоралари ҳисобланади ва ушбу тўловлар иш берувчи томонидан тўланиши мажбурий бўлган тўловларга кирмайди. МКнинг 153-моддасига кўра, мукофотлар, қўшимча тўловлар, устамалар, рағбатлантириш тарзидаги тўловлар жамоа шартномаларида, шунингдек иш берувчи томонидан касаба уюшмаси қўмитаси билан келишиб қабул қилинадиган бошқа локал ҳужжатларда белгиланади. Агар бундай тўловлар жамоа шартномасида (корхонанинг бошқа локал ҳужжатларда) кўзда тутилмаган ёки корхонанинг молия имкониятларидан келиб чиқиб тўланиши белгиланган бўлса, бу ҳолда иш берувчи мазкур тўловларни тўлаш имконияти бўлмай қолса, уни жавобгарликка тортиб бўлмайди. Корхона бош ҳисобчиси фақатгина иш берувчининг буйруғини бажаради. Агар у буйруқни бажармаса, унга нисбатан иш берувчи томонидан интизомий жазо қўлланилиши мумкин.
Юқоридагиларни инобатга олиб, касаба уюшмаси қўмитаси мукофот пулини тўлаш имкониятини топиш бўйича иш берувчи билан келишиб олишини тавсия қиламиз.
Жавоблар улар эълон қилинган санада долзарб ҳисобланади.