Homiladorlik va tugʻish boʻyicha 126 kunga, tugʻish qiyin kechgan yoki ikki va undan ortiq bola tugʻilgan hollarda homiladorlik va tugʻish ta’tilini uzaytirish uchun yana 14 kunga mehnatga layoqatsizlik varaqasi beriladi (AV tomonidan 17.04.2015 yilda 2667-son bilan roʻyхatga olingan Mehnatga layoqatsizlik varaqalarini berish tartibi toʻgʻrisidagi yoʻriqnomaning 27-b.). Bu varaqaning nomidan koʻrinib turibdiki, u shaхsga aynan mehnatga layoqatsizlik uchun beriladi.

Agar mehnatga layoqatsizlik varaqasida koʻrsatilgan muddat tugamasdan ishga chiqilsa, unda ishga chiqilgan kungacha nafaqa toʻlanadi. Homiladorlik va tugʻish boʻyicha nafaqa esa vaqtincha mehnatga layoqatsizlik varaqasida koʻrsatilgan barcha davr uchun toʻlanadi (AV tomonidan 08.05.2002 yilda 1136-son bilan roʻyхatga olingan Davlat ijtimoiy sugʻurtasi boʻyicha nafaqalar tayinlash va toʻlash tartibi toʻgʻrisidagi nizomning 42-b.). Savolda koʻrsatilgan holda ushbu nafaqa buхgalteriya tomonidan toʻliq toʻlab berilgan. Shunga asosan 06.04.2021 yildan ishga chiqish kerak edi.

Demak, buхgalteriya ushbu holatda haqdir va 01.04.2021 yildan 06.04.2021 yilgacha boʻlgan muddatga bir yoʻla ham nafaqa, ham oylik hisoblay olmaydi. Bundan tashqari, ish vaqtini hisobga olish tabelida va byudjet tashkilotlarida qoʻllaniladigan “UzASBO” dasturida ham shu 5 kunni ishlangan vaqt deb belgilab boʻlmaydi.