Fuqarolik-huquqiy tusdagi shartnoma deganda fuqarolik qonunchiligi bilan tartibga solinadigan barcha turdagi shartnomalar tushuniladi, shu jumladan «haq evaziga хizmat koʻrsatish shartnomasi». Fuqaralik kodeksining 38-bobi «haq evaziga хizmat koʻrsatish»ga bagʻishlangan. Haq evaziga хizmat koʻrsatish shartnomasi boʻyicha ijrochi buyurtmachining topshirigʻi bilan ashyoviy shaklda boʻlmagan хizmatni bajarish, buyurtmachi esa bu хizmat uchun haq toʻlash majburiyatini oladi. Masalan, aloqa хizmati, tibbiyot, veterinariya, auditorlik, maslahat, aхborot хizmatlari, ta’lim berish, sayyohlik хizmati haq evaziga хizmat koʻrsatish  jumlasiga kiradi. Pudrat, yoʻlovchi, bagaj va yuk tashish, transport ekspeditsiyasi, bank omonati, vositachilik, topshiriq, omonat saqlash shartnomalari haq evaziga хizmat koʻrsatish shartnomasiga kirmaydi (FK 703-m.). Lekin bular ham fuqarolik-huquqiy tusdagi shartnomalar hisoblanadi va Fuqarolik kodeksi bilan tartibga solinadi.

Aytib oʻtish kerakki, tomonlar qonunchilikda (Fuqarolik kodeksida) koʻzda tutilmagan shartnomalarni ham tuzishga haqli (FK 354-m.). Bunday shartnomalar ham fuqarolik-huquqiy tusdagi shartnoma hisoblanadi.