Oʻrindoshlik asosida ishlash tartibi VMning 2012 yil 18 oktyabrdagi 297-son qarori bilan tasdiqlangan Nizomda keltirilgan. Oʻrindoshlik asosida ishlash - хodimning oʻzining asosiy ishini bajarishidan tashqari asosiy ishidan boʻsh vaqtida mehnat shartnomasi asosida boshqa haq toʻlanadigan ishni bajarishi (Nizomning 2-b.). Xodim bilan oʻrindoshlik asosida ishlash uchun tuziladigan mehnat shartnomasida Mehnat kodeksida belgilangan talablar bilan birgalikda ish vaqtining davomiyligi majburiy tartibda koʻrsatiladi. Oʻrindoshlar mehnatiga haq toʻlash mehnat shartnomasiga muvofiq amalga oshiriladi (Nizomning 8, 11-b.). Bundan tashqari, asosiy ish boʻyicha shartnomada boshqa lavozim shartlari, boshqa ish rejimi, ish haqi va h.k. mavjud. Yuqoridagilarga asosan oʻrindoshlikda (tashqi yoki ichki oʻrindoshlikdan qat’i nazar) alohida mehnat shartnomasi tuziladi.

Buyruq chiqarish uchun хodim bilan tuzilgan mehnat shartnomasi asos boʻladi (MKning 82-m.).

Demak, хodim oʻrindoshlik boʻyicha ishlashi uchun u bilan alohida mehnat shartnomasi tuziladi va shartnomaga asosan buyruq chiqariladi.

Agar хodim mehnat shartnomasida koʻrsatilgan oʻzining asosiy ishi bilan bir qatorda va belgilangan ish vaqti davomida boshqa kasb va lavozimda qoʻshimcha ishni bajarsa, bunday ish bir necha kasbda va lavozimda ishlash hisoblanadi. Bu holatda alohida mehnat shartnomasi tuzilmasdan asosiy mehnat shartnomasiga qoʻshimcha kelishuv tuzilishi mumkin. Amalda bunday ish faqat buyruq bilan rasmiylashtirilishi ham mumkin.