Ўриндошлик асосида ишлаш тартиби ВМнинг 2012 йил 18 октябрдаги 297-сон қарори билан тасдиқланган Низомда келтирилган. Ўриндошлик асосида ишлаш - ходимнинг ўзининг асосий ишини бажаришидан ташқари асосий ишидан бўш вақтида меҳнат шартномаси асосида бошқа ҳақ тўланадиган ишни бажариши (Низомнинг 2-б.). Ходим билан ўриндошлик асосида ишлаш учун тузиладиган меҳнат шартномасида Меҳнат кодексида белгиланган талаблар билан биргаликда иш вақтининг давомийлиги мажбурий тартибда кўрсатилади. Ўриндошлар меҳнатига ҳақ тўлаш меҳнат шартномасига мувофиқ амалга оширилади (Низомнинг 8, 11-б.). Бундан ташқари, асосий иш бўйича шартномада бошқа лавозим шартлари, бошқа иш режими, иш ҳақи ва ҳ.к. мавжуд. Юқоридагиларга асосан ўриндошликда (ташқи ёки ички ўриндошликдан қатъи назар) алоҳида меҳнат шартномаси тузилади.

Буйруқ чиқариш учун ходим билан тузилган меҳнат шартномаси асос бўлади (МКнинг 82-м.).

Демак, ходим ўриндошлик бўйича ишлаши учун у билан алоҳида меҳнат шартномаси тузилади ва шартномага асосан буйруқ чиқарилади.

Агар ходим меҳнат шартномасида кўрсатилган ўзининг асосий иши билан бир қаторда ва белгиланган иш вақти давомида бошқа касб ва лавозимда қўшимча ишни бажарса, бундай иш бир неча касбда ва лавозимда ишлаш ҳисобланади. Бу ҳолатда алоҳида меҳнат шартномаси тузилмасдан асосий меҳнат шартномасига қўшимча келишув тузилиши мумкин. Амалда бундай иш фақат буйруқ билан расмийлаштирилиши ҳам мумкин.