Sizning vaziyatingizdan kelib chiqqan holda, sud qaroriga koʻra aliment хodimning ish haqining 25%i miqdorida undirilishi lozim.

Qarzdorning ish haqi va unga tenglashtirilgan toʻlovlardan ushlab qolinadigan summalar miqdori soliqlar ushlab qolingandan keyin qolgan summadan hisoblab chiqariladi (“Sud hujjatlari va boshqa organlar hujjatlarini ijro etish toʻgʻrisida”gi Qonun 65-moddasi). Ya’ni avval хodimning ish haqidan daromad soligʻi ushlab qolinib, qolgan summadan 25% aliment hisoblanishi kerak.

Shu bilan birga har bir bola uchun undiriladigan aliment miqdori qonunchilik bilan belgilangan mehnatga haq toʻlash eng kam miqdorining 26,5%idan kam boʻlmasligi kerak (Oila kodeksi 99-moddasi). Bu me’yor yangi kuchga kirgan Mehnat kodeksida emas, Oila kodeksida belgilangan. Ushbu 26,5% хodimning okladidan emas, aynan mehnatga haq toʻlash eng kam miqdoridan hisoblanadi.

2023 yil 1 maydan e’tiboran mehnatga haq toʻlash eng kam miqdori 980000 soʻmni tashkil etadi (№ PF-45, 28.03.2023 y.). Mehnatga haq toʻlash eng kam miqdorining 26,5%i esa 259 700 soʻm (980000 х 26,5%).

Demak, sud qaroriga muvofiq hisoblab chiqarilgan ish haqidan 25% miqdoridagi 1 oylik aliment summasi bugungi kunda 259 700 soʻmdan kam boʻlsa, aliment 259 700 soʻm miqdorida hisoblanib toʻlanishi kerak.

Shunga ham ahamiyat beringki, aliment хodimning soliq yukini koʻpaytirmaydi. Soliqlar davlat byudjetiga, aliment esa хodimning farzandi uchun toʻlanadi.

Mehnat kodeksiga muvofiq har bir toʻlov chogʻida ish haqidan ushlab qolingan mablagʻlarning umumiy summasi хodimga haqiqatda hisoblangan ish haqining ellik foizidan oshishi mumkin emas. Lekin bu belgilangan cheklov aliment majburiyatlari boʻyicha qarzdorlikni хodimning ish haqini ushlab qolishga nisbatan tatbiq etilmaydi. Bunday holda aliment majburiyatlari boʻyicha qarzdorlikdan ushlab qolish miqdori хodimga haqiqatda hisoblangan ish haqining yetmish foizidan oshishi mumkin emas (MK 270-m.).