Ish vaqtidan tashqari ishning davomiyligi хodim uchun yiliga 120 soatdan oshmasligi kerak (MK 190-m.). Ish vaqtidan tashqari ish deganda хodim uchun belgilangan ish vaqti davomiyligidan tashqari ishga jalb etish deb hisoblanadi. Ish vaqti kunlik hisobga olinganda хodim uchun belgilangan har kungi ish (smena) vaqtining davomiyligidan oshadigan ish ish vaqtidan tashqari ish deb hisoblanadi. Ish vaqti haftalik hisobga olinganda хodim uchun belgilangan haftalik ish vaqtining davomiyligidan oshadigan ish ish vaqtidan tashqari ish deb hisoblanadi. Ish vaqti jamlab hisobga olinganda bir haftadan oshadigan hisobga olish davri uchun хodimga belgilangan ish vaqtining davomiyligidan tashqari ish ish vaqtidan tashqari ish deb hisoblanadi (MK 189-m.). Ya’ni, belgilangan хisobga olinadigan vaqt ichida normadan ortiqcha ish ish vaqtidan tashqari ish deyiladi. Misol uchun, хodimga kundalik (smenalik) ish 8 soat belgilangan boʻlib, ushbu хodim shu kuni 10 soat ishlagan boʻlsa, u ish vaqtidan tashqari 2 soat ishlagan boʻladi. Ikkinchi misol: hafta davomida 40 soat ishlash kerak boʻlib, 45 soat ishlangan boʻlsa, bunda ish vaqtidan tashqari 5 soat ishlangan boʻladi.

Savolda keltirilgan vaziyatda хodimga 15 kunlik ishga 165 soat belgilangan. Xuddi shu 15 kun ichida 165 soatdan ortiqcha ishlagan boʻlsa, oʻsha ortiqcha soatlar ish vaqtidan tashqari ish deb hisoblanadi va bunday ortiqcha ish soatlari yiliga 120 soatdan oshishi mumkin emas. Agar 15 kun ichida ish soatlari normadan oshmagan boʻlib, хodim oʻzining dam olish kunlari ishga jalb qilinsa, bu ish vaqtidan tashqari ish deb hisoblamaydi. Bunday ish dam olish kunidagi ish deb hisoblanadi. Qonunchilikda dam olish kunlari ishga necha marta jalb qilinish mumkinligi belgilanmagan. Dam olish kunlari ishga jalb qilish Mehnat kodeksining 209-212-moddalarida belgilangan tartibda amalga oshiriladi.