Oʻrindoshlik asosida ishlash хodimning oʻzining asosiy ishidan tashqari alohida mehnat shartnomasi shartlari boʻyicha asosiy ishidan boʻsh vaqtida boshqa muntazam haq toʻlanadigan ishni bajarishidir (MKning 432-m. 1-q.).

Oʻrindoshlik asosida ishlash chogʻida oʻrindoshlik asosida ishlashning davomiyligi хodimlarning mazkur toifasi uchun belgilangan ish vaqti normasining yarmidan ortiq boʻlishi mumkin emas (bundan sogʻliqni saqlash tizimi tashkilotlarining shifokor хodimlari mustasno).

Xodim asosiy ish joyidagi mehnat majburiyatlarini bajarishdan boʻshagan kunlarda oʻrindoshlik asosida toʻliq ish kunida ishlashi mumkin.

Oʻrindoshlar uchun ish vaqti davomiyligining har kunlik yarim normasiga rioya etilishi mumkin boʻlmagan taqdirda, ish vaqtini jamlab hisobga olishni yuritishga yoʻl qoʻyiladi. Ish vaqtini jamlab hisobga olishni yuritish chogʻida oʻrindoshlik asosidagi ish vaqtining (smenaning) umumiy davomiyligi hisobga olinayotgan davr uchun oʻrindoshlik lavozimi boʻyicha ish vaqti normasining yarmidan koʻp boʻlmasligi kerak (MKning 437-m.).

Umumiy asoslarga koʻra, mehnat va dam olish rejimi jamoa kelishuvida aks ettiriladi (MKning 85-m.).

Mehnat shartnomasiga kiritilishi shart boʻlgan shartlarga jumladan ish vaqti rejimi (agar bu хodim uchun ushbu rejim mazkur ish beruvchida mehnat faoliyatini amalga oshiradigan хodimlar uchun nazarda tutilgan ish vaqtining va dam olish vaqtining umumiy rejimidan farq qiladigan boʻlsa) kiradi (MKning 104-m.).

Shunga koʻra, ushbu holatda хodimlar asosiy ish joyidagi ish rejimini buzgan holda ish vaqtida boshqa joyda pedagogik faoliyat bilan shugʻullanishsa, bu mehnat shartnomasi va ichki tartibni buzish hisoblanadi va mehnat shartnomasining ish beruvchi tomonidan bekor qilinishiga asos boʻlishi mumkin.

Shu bilan birga, ish beruvchi (agar ilmiy-tadqiqot instituti boʻysunuvchi tegishli tarmoq, vazirlik va idoralar tomonidan bunga taqiq oʻrnatilgan boʻlmasa), bunday хodimlar bilan mehnat shartnomasiga qoʻshimcha kelishuv orqali oʻzgartirish kiritib, ularga alohida ish rejimi belgilashi mumkin.