Ўриндошлик асосида ишлаш ходимнинг ўзининг асосий ишидан ташқари алоҳида меҳнат шартномаси шартлари бўйича асосий ишидан бўш вақтида бошқа мунтазам ҳақ тўланадиган ишни бажаришидир (МКнинг 432-м. 1-қ.).

Ўриндошлик асосида ишлаш чоғида ўриндошлик асосида ишлашнинг давомийлиги ходимларнинг мазкур тоифаси учун белгиланган иш вақти нормасининг ярмидан ортиқ бўлиши мумкин эмас (бундан соғлиқни сақлаш тизими ташкилотларининг шифокор ходимлари мустасно).

Ходим асосий иш жойидаги меҳнат мажбуриятларини бажаришдан бўшаган кунларда ўриндошлик асосида тўлиқ иш кунида ишлаши мумкин.

Ўриндошлар учун иш вақти давомийлигининг ҳар кунлик ярим нормасига риоя этилиши мумкин бўлмаган тақдирда, иш вақтини жамлаб ҳисобга олишни юритишга йўл қўйилади. Иш вақтини жамлаб ҳисобга олишни юритиш чоғида ўриндошлик асосидаги иш вақтининг (сменанинг) умумий давомийлиги ҳисобга олинаётган давр учун ўриндошлик лавозими бўйича иш вақти нормасининг ярмидан кўп бўлмаслиги керак (МКнинг 437-м.).

Умумий асосларга кўра, меҳнат ва дам олиш режими жамоа келишувида акс эттирилади (МКнинг 85-м.).

Меҳнат шартномасига киритилиши шарт бўлган шартларга жумладан иш вақти режими (агар бу ходим учун ушбу режим мазкур иш берувчида меҳнат фаолиятини амалга оширадиган ходимлар учун назарда тутилган иш вақтининг ва дам олиш вақтининг умумий режимидан фарқ қиладиган бўлса) киради (МКнинг 104-м.).

Шунга кўра, ушбу ҳолатда ходимлар асосий иш жойидаги иш режимини бузган ҳолда иш вақтида бошқа жойда педагогик фаолият билан шуғулланишса, бу меҳнат шартномаси ва ички тартибни бузиш ҳисобланади ва меҳнат шартномасининг иш берувчи томонидан бекор қилинишига асос бўлиши мумкин.

Шу билан бирга, иш берувчи (агар илмий-тадқиқот институти бўйсунувчи тегишли тармоқ, вазирлик ва идоралар томонидан бунга тақиқ ўрнатилган бўлмаса), бундай ходимлар билан меҳнат шартномасига қўшимча келишув орқали ўзгартириш киритиб, уларга алоҳида иш режими белгилаши мумкин.