Savolda aynan qaysi lavozimdan boshqa lavozimga oʻtkazilishi koʻrsatilmagan, ya’ni asosiy lavozimdan boshqasigami yoki qoʻshimcha lavozimdan boshqasigami. Ikkala variantni koʻrib chiqamiz:

1. Xodimni qoʻshimcha boʻlgan filial boshligʻi lavozimidan boshqa qoʻshimcha lavozimga oʻtkazish.

Agar хodimga MKning 116-moddasiga asosan qoʻshimcha ish  doimiy asosda yuklatilgan boʻlsa, bunday kelishuv mehnat shartnomasiga qoʻshimcha kelishuv tarzida rasmiylashtiriladi. Agar хodimga qoʻshimcha ish belgilangan muddatga (muayyan muddatga) yuklatilsa, mehnat shartnomasiga oʻzgartirish kiritish talab etilmaydi va ish beruvchining buyrugʻi bilan rasmiylashtiriladi. Xodim buyruqning matni bilan tanishtirilishi va rozi boʻlgan taqdirda uni imzolashi kerak (MK 116-m.). Shunga koʻra, buхgalterga (asosiy lavozim) filial boshligʻi vazifasi yuklatilgan boʻla turib, keyinchalik ushbu vazifadan ozod etilib, boshqa lavozim boʻyicha qoʻshimcha doimiy ish yuklatilsa, asosiy mehnat shartnomasiga qoʻshimcha kelishuv tuzilib, oʻzgartirishlar kiritiladi. Bunda filial boshligʻi vazifasidan ozod etib, boshqa lavozim boʻyicha ish yuklatish toʻgʻrisida buyruq chiqariladi. Asos mehnat shartnomasiga tuzilgan qoʻshimcha kelishuv boʻladi. Agar boshqa lavozim boʻyicha qoʻshimcha ish ma’lum bir vaqtga yuklatilsa, buyruqning oʻzi bilan rasmiylashtiriladi.

2. Xodimni asosiy ishdan boshqa ishga oʻtkazish.

Xodimni boshqa ishga oʻtkazishga faqat uning roziligi bilan yoʻl qoʻyiladi (MK 140-m.).  Ishlab chiqarish zaruriyati yoki bekor turib qolish munosabati bilan хodimni boshqa ishga uning roziligisiz oʻtkazishga yoʻl qoʻyiladi. Lekin  bekor turib qolish sababli хodimni pastroq malaka talab etiladigan ishga vaqtincha oʻtkazishga хodimning yozma roziligi bilan yoʻl qoʻyiladi (MK 145-m.).

Xodimni doimiy boshqa ishga oʻtkazish toʻgʻrisida buyruq chiqarish uchun mehnat shartnomasiga kiritilgan oʻzgartishlar asos boʻladi. Shunga asosan mehnat shartnomasiga boshqa lavozimga oʻtkazish toʻgʻrisida  qoʻshimcha kelishuv tuzilib, buyruq chiqariladi.

Xodimni vaqtincha boshqa ishga oʻtkazish buyruqning oʻzi bilan rasmiylashtiriladi.