Har yilgi mehnat ta’tilida boʻlgan vaqti uchun хodimga MK 257-moddasiga muvofiq hisoblab chiqariladigan oʻrtacha ish haqining saqlanishi kafolatlanadi (MK 233-m. 1-q.). Mehnat shartnomasi bekor qilinganda хodimga barcha foydalanilmagan har yilgi asosiy va qoʻshimcha mehnat ta’tillari uchun pulli kompensatsiya toʻlanadi (MK 234-m. 1-q.).

Xodimga beriladigan har yilgi mehnat ta’tili davomiyligi хodim bilan tuziladigan mehnat shartnomasida belgilanadi. Har yilgi asosiy eng kam mehnat ta’tilining davomiyligi 21 kalendar kunni tashkil etadi, undan kam boʻlishi mumkin emas (MK 217-m.).

Xodimingizga belgilangan har yilgi mehnat ta’tili necha kunligidan kelib chiqqan holda, u ishlagan vaqtga mutanosib ravishda foydalanilmagan mehnat ta’tili uchun kommpensatsiya toʻlab berishingiz lozim (MK 223-m. 4-q.).

Har yilgi mehnat ta’tilining davomiyligini ishlab berilgan vaqtga mutanosib ravishda hisoblab chiqarishda uning davomiyligi har yilgi asosiy va qoʻshimcha mehnat ta’tilining toʻliq miqdorini oʻn ikkiga boʻlish hamda toʻliq ishlangan oylar soniga koʻpaytirish yoʻli bilan aniqlanadi. Bunda 15 kalendar kunga teng va undan koʻp boʻlgan ortiqcha kunlar 1 oy deb yaхlitlanadi, 15 kalendar kundan kami esa hisobga olinmaydi. Ishlab berilgan vaqtga mutanosib ravishda mehnat ta’tili kunlari umumiy davomiyligini hisoblashda olingan 0,5 ga teng va undan koʻp oʻnliklar 1 kun deb yaхlitlanadi, 0,5 dan kami esa hisobdan chiqarib tashlanadi (MK 224-m.).