Adliya vazirligida 2020 yil 30 iyunda 3256-son bilan roʻyхatga olingan Davlat soliq qoʻmitasining 2020 yil 1 iyundagi 2020-22-son qarori bilan Undirilishi umidsiz deb e’tirof etilgan soliq qarzini hisobdan chiqarish tartibi toʻgʻrisidagi nizom tasdiqlangan. Mazkur Nizom Soliq kodeksi, Fuqarolik kodeksi va "Toʻlovga qobiliyatsizlik toʻgʻrisida"gi Qonunga muvofiq undirilishi umidsiz deb e’tirof etilgan soliq qarzini hisobdan chiqarish tartibini belgilaydi. Mazkur Nizomning 4-bandiga asosan soliq organi soliq qarzini undirishning belgilangan muddati oʻtishi munosabati bilan uni undirish imkoniyatini yoʻqotganligi toʻgʻrisida sud tomonidan qaror qabul qilinganda, shu jumladan sud tomonidan soliq qarzini undirish toʻgʻrisida ariza berishning oʻtkazib yuborilgan muddatini tiklashni rad etish haqida ajrim chiqarilganda soliq qarzi undirilishi umidsiz deb e’tirof etiladi.