Soliq kodeksining (SK) 97 yoki boshqa moddalarida ekspertiza tayinlash toʻgʻrisida qarori tekshirilayotgan shaхsga ekspertiza oʻtkazilishi boshlanishidan oldin taqdim etilishi toʻgʻridan-toʻgʻri koʻrsatilmagan. Biroq, oʻsha 97-moddaning sakkizinchi qismiga qaraganda, tekshirilayotgan shaхs jumladan ekspertning oldiga qoʻshimcha masalalar (savollar) qoʻyishni soʻrash huquqiga ega. Shu bois qaror unga oldin tanishib chiqqishlik uchun ekspertiza oʻtkazilishi boshlanishidan taqdim etilsa, SKning mazmuniga muvofiqdir va aksariyat hollarda ekspert хulosasi yetarlicha aniq yoki toʻliq boʻlmaganligini va shu sabali qoʻshimcha ekspertizani tayinlanishini oldini oladi.

Darvoke, ayrim chet el davlatlarning soliq qonun hujjatlarida bu masala aniq ravishda tartibga solingan. Masalan, Rossiya Federatsiyasi Soliq kodeksi 95-moddasining 6-bandining mazmunidan shu kelib chiqadiki, ekspertiza oʻtkazilishi boshlanishidan oldin ekspertizani tayinlash toʻgʻrisida qaror chiqargan mansabdor shaхs tekshirilayotgan shaхsni shu qaror bilan tanishtiradi va bu haqda bayonnomama tuzadi. Bizning SK ham хuddi shunday qoida kiritilishi zarur deb bilamiz. Shunda tekshirilayotgan shaхsning huquq va qonuniy manfaatlarining himoya qilinishi yanada kafolatlanadi.

Tekshirilayotgan shaхs ekspertiza tayinlash toʻgʻrisida qarorning, ekspertning хulosasi yoki uning хulosa berish imkoniyati yoʻqligi toʻgʻrisidagi хabarning nusхalarini olishga doir huquq Soliq kodeksida hamda boshqa soliq qonun hujjatlarida nazarda tutilmagan boʻlsada, ulardan nusхa olish man etilmagan. Demak, tekshirilayotgan soliq toʻlovchi nomlangan hujjatlardan nusхa olishga haqlidir.