Солиқ кодексининг (СК) 97 ёки бошқа моддаларида экспертиза тайинлаш тўғрисида қарори текширилаётган шахсга экспертиза ўтказилиши бошланишидан олдин тақдим этилиши тўғридан-тўғри кўрсатилмаган. Бироқ, ўша 97-модданинг саккизинчи қисмига қараганда, текширилаётган шахс жумладан экспертнинг олдига қўшимча масалалар (саволлар) қўйишни сўраш ҳуқуқига эга. Шу боис қарор унга олдин танишиб чиққишлик учун экспертиза ўтказилиши бошланишидан тақдим этилса, СКнинг мазмунига мувофиқдир ва аксарият ҳолларда эксперт хулосаси етарлича аниқ ёки тўлиқ бўлмаганлигини ва шу сабали қўшимча экспертизани тайинланишини олдини олади.

Дарвоке, айрим чет эл давлатларнинг солиқ қонун ҳужжатларида бу масала аниқ равишда тартибга солинган. Масалан, Россия Федерацияси Солиқ кодекси 95-моддасининг 6-бандининг мазмунидан шу келиб чиқадики, экспертиза ўтказилиши бошланишидан олдин экспертизани тайинлаш тўғрисида қарор чиқарган мансабдор шахс текширилаётган шахсни шу қарор билан таништиради ва бу ҳақда баённомама тузади. Бизнинг СК ҳам худди шундай қоида киритилиши зарур деб биламиз. Шунда текширилаётган шахснинг ҳуқуқ ва қонуний манфаатларининг ҳимоя қилиниши янада кафолатланади.

Текширилаётган шахс экспертиза тайинлаш тўғрисида қарорнинг, экспертнинг хулосаси ёки унинг хулоса бериш имконияти йўқлиги тўғрисидаги хабарнинг нусхаларини олишга доир ҳуқуқ Солиқ кодексида ҳамда бошқа солиқ қонун ҳужжатларида назарда тутилмаган бўлсада, улардан нусха олиш ман этилмаган. Демак, текширилаётган солиқ тўловчи номланган ҳужжатлардан нусха олишга ҳақлидир.