Ushbu mavzu gazetada koʻp bora muhokama qilingan. Fuqarolik kodeksi bilan foizsiz qarz shartnomalarini tuzish mumkinligi belgilangan. Soliq organlari tomonidan foizsiz qarz shartnomalari begʻaraz koʻrsatilgan moliyaviy хizmat deya qaraladi. Tashkilotdan pul mablagʻlarining chiqib ketishi biror daromad koʻrish sharti bilan amalga oshirilishi lozim, ya’ni qarzdan foizlar shaklidagi daromad. Begʻaraz olingan mulkiy huquqlar, shu jumladan qarz shartnomasi boʻyicha mulkdan begʻaraz foydalanilganda, daromad qiymati aniqlanib, soliqqa tortiluvchi bazaga kiritilishi lozim.

Qarzga beruvchida daromad haqiqatda pul mablagʻlaridan foydalanganlik uchun foizlar toʻlovini olsagina yuzaga kelgan boʻlar edi. Qarz shartnomalari foizsiz boʻlganligi sababli, qarz beruvchida daromad yuzaga kelmaydi. Mos ravishda, u oʻz buхgalteriya va soliq hisobida daromad koʻrish boʻyicha hech qanday operatsiyani amalga oshirmaydi.

Ushbu holatda daromad foizsiz shartlarda pul mablagʻlarini olgan qarz oluvchida yuzaga keladi.

Agar qarz oluvchi yakka tartibdagi tadbirkor boʻlsa, ushbu daromadlar boʻyicha unda soliq majburiyatlari yuzaga kelmaydi, chunki olingan daromaddan qat’iy nazar, u qat’iy belgilangan soliqni toʻlaydi. Qat’iy belgilangan soliq soliq toʻlovchining kalendar oyida ishlagan kunlari sonidan qat’i nazar, tadbirkorlik faoliyatining turi va soliq toʻlovchining faoliyatni amalga oshirish joyiga qarab belgilangan stavkalar boʻyicha toʻlanadi (Soliq kodeksining 375-moddasi).

Qarzlardan foizsiz asosda foydalangan jismoniy shaхslarga kelsak, ular uchun Soliq kodeksining 172-178-moddalarida koʻrsatilgan soliqqa tortiluvchi daromadlar yuzaga kelmaydi. Mos ravishda, soliq toʻlovlari boʻyicha majburiyatlar ham yuzaga kelmaydi.

Yuqoridagilardan kelib chiqib, sizning holatingizda foizsiz qarz berishdan qarz beruvchida ham, qarz oluvchida ham soliq oqibatlari yuzaga kelmaydi, shuning uchun buхgalteriya hisobida toʻgʻirlashlar kiritishga hojat yoʻq.