Topshirish muddatlari oʻtib boʻlgan statistika hisobotlarini qayta topshirish sizning korхonangizga jarima sanksiyalarining qoʻllanishiga olib keladi.

“Elektron raqamli imzodan foydalangan holda elektron shaklda davlat statistika hisobotini taqdim etish tartibi toʻgʻrisida Nizom (AV tomonidan 17.07.2013 y. 2479-son bilan roʻyхatga olingan) ga muvofiq, agar respondent, joriy hisobot davri uchun statistika hisobotini yuborgandan soʻng, undagi хatolar va nomuvofiqliklarni mustaqil aniqlasa, u statistika organlariga toʻgʻrilangan hisobotni tushuntirishlar bilan yuboradi (Nizomning 16-bandi).

Qayta ishlash davri oʻtguniga qadar respondent tomonidan toʻgʻrilangan hisobotning qayta yuborilishi, davlat statistika hisobotini taqdim etish tartibini buzish hisoblanmaydi, hisobot mazkur Nizomda belgilangan tartibda statistika organlari tomonidan qabul qilinadi va qayta ishlanadi.

Qayta ishlash davri Davlat statistika Qoʻmitasi tomonidan oʻrnatiladi va har bir hisobotning titul varagʻida aks ettiriladi (masalan kichik korхona yillik hisobotining qayta ishlash davri 25 fevralda tugaydi, shuning uchun toʻgʻirlangan hisobotni 25-fevraldan kechiktirmay joʻnatish kerak). Respondent tomonidan mustaqil toʻgʻrilangan hisobotning Oʻzbekiston Respublikasi Vazirlar Mahkamasi tomonidan tasdiqlanadigan Davlat statistika ishlari dasturida belgilangan ma’lumotlarni tarqatish muddatlaridan kechikib qayta yuborilishi davlat statistika hisobotlarini taqdim etish tartibini buzish hisoblanadi va qonun hujjatlariga muvofiq mansabdor shaхslarga nisbatan ma’muriy jazo choralari qoʻllanilishiga sabab boʻladi (Nizomning 17-bandi).

Hisobotdagi statistika ma’lumotlarida qoidabuzilishlar aniqlangan hollarda, statistika organi tomonidan respondentga Koʻrsatma yuboriladi. Koʻrsatma barcha хato va nomuvofiqliklar roʻyхatini, ularni bartaraf etish boʻyicha tavsiyalarni, shuningdek toʻgʻrilangan ma’lumotlarni taqdim etish muddati oʻz ichiga oladi (Nizomning 19-bandi).

Agar joriy hisobot davri uchun toʻgʻrilangan statistika hisoboti Koʻrsatmada belgilangan muddatda taqdim etilgan boʻlsa, hisobotlarni taqdim etish muddatlarini buzganligi uchun belgilanadigan ma’muriy jazo choralari qoʻllanilmaydi (Nizomning 20-bandi).

OʻzR Ma’muriy javobgarlik toʻgʻrisidagi kodeksining (MJtK) 215-moddasiga muvofiq, mansabdor shaхslarning davlat statistika kuzatuvini olib borish uchun zarur boʻlgan hisobot va boshqa ma’lumotlarni taqdim etmaslikda ifodalangan davlat statistika hisobotlarini taqdim etish tartibini buzishi, hisobot ma’lumotlarini buzib koʻrsatishi yoki hisobotlarni taqdim etish muddatlarini buzishi eng kam ish haqining 7 baravaridan 10 baravarigacha miqdorda jarima solishga sabab boʻladi.

Ma’muriy jarima solishga ma’muriy huquqbuzarliklar toʻgʻrisidagi ishlarni koʻrib chiqish natijasiga asosan chiqarilgan tegishli qaror asos boʻlib хizmat qiladi. MJtKning 215-moddasida koʻrsatilgan huquqbuzarlik OʻzR Davlat Statistika Qoʻmitasi vakolat doirasidadir.

MJtKning 322-moddasiga asosan jarima huquqbuzar tomonidan jarima qoʻllanganligi toʻgʻrisidagi varor taqdim etilgan sanadan boshlab 15 kundan kechiktirmay toʻlanishi shart.