Топшириш муддатлари ўтиб бўлган статистика ҳисоботларини қайта топшириш сизнинг корхонангизга жарима санкцияларининг қўлланишига олиб келади.

“Электрон рақамли имзодан фойдаланган ҳолда электрон шаклда давлат статистика ҳисоботини тақдим этиш тартиби тўғрисида Низом (АВ томонидан 17.07.2013 й. 2479-сон билан рўйхатга олинган) га мувофиқ, агар респондент, жорий ҳисобот даври учун статистика ҳисоботини юборгандан сўнг, ундаги хатолар ва номувофиқликларни мустақил аниқласа, у статистика органларига тўғриланган ҳисоботни тушунтиришлар билан юборади (Низомнинг 16-банди).

Қайта ишлаш даври ўтгунига қадар респондент томонидан тўғриланган ҳисоботнинг қайта юборилиши, давлат статистика ҳисоботини тақдим этиш тартибини бузиш ҳисобланмайди, ҳисобот мазкур Низомда белгиланган тартибда статистика органлари томонидан қабул қилинади ва қайта ишланади.

Қайта ишлаш даври Давлат статистика Қўмитаси томонидан ўрнатилади ва ҳар бир ҳисоботнинг титул варағида акс эттирилади (масалан кичик корхона йиллик ҳисоботининг қайта ишлаш даври 25 февральда тугайди, шунинг учун тўғирланган ҳисоботни 25-февралдан кечиктирмай жўнатиш керак). Респондент томонидан мустақил тўғриланган ҳисоботнинг Ўзбекистон Республикаси Вазирлар Маҳкамаси томонидан тасдиқланадиган Давлат статистика ишлари дастурида белгиланган маълумотларни тарқатиш муддатларидан кечикиб қайта юборилиши давлат статистика ҳисоботларини тақдим этиш тартибини бузиш ҳисобланади ва қонун ҳужжатларига мувофиқ мансабдор шахсларга нисбатан маъмурий жазо чоралари қўлланилишига сабаб бўлади (Низомнинг 17-банди).

Ҳисоботдаги статистика маълумотларида қоидабузилишлар аниқланган ҳолларда, статистика органи томонидан респондентга Кўрсатма юборилади. Кўрсатма барча хато ва номувофиқликлар рўйхатини, уларни бартараф этиш бўйича тавсияларни, шунингдек тўғриланган маълумотларни тақдим этиш муддати ўз ичига олади (Низомнинг 19-банди).

Агар жорий ҳисобот даври учун тўғриланган статистика ҳисоботи Кўрсатмада белгиланган муддатда тақдим этилган бўлса, ҳисоботларни тақдим этиш муддатларини бузганлиги учун белгиланадиган маъмурий жазо чоралари қўлланилмайди (Низомнинг 20-банди).

ЎзР Маъмурий жавобгарлик тўғрисидаги кодексининг (МЖтК) 215-моддасига мувофиқ, мансабдор шахсларнинг давлат статистика кузатувини олиб бориш учун зарур бўлган ҳисобот ва бошқа маълумотларни тақдим этмасликда ифодаланган давлат статистика ҳисоботларини тақдим этиш тартибини бузиши, ҳисобот маълумотларини бузиб кўрсатиши ёки ҳисоботларни тақдим этиш муддатларини бузиши энг кам иш ҳақининг 7 бараваридан 10 бараваригача миқдорда жарима солишга сабаб бўлади.

Маъмурий жарима солишга маъмурий ҳуқуқбузарликлар тўғрисидаги ишларни кўриб чиқиш натижасига асосан чиқарилган тегишли қарор асос бўлиб хизмат қилади. МЖтКнинг 215-моддасида кўрсатилган ҳуқуқбузарлик ЎзР Давлат Статистика Қўмитаси ваколат доирасидадир.

МЖтКнинг 322-моддасига асосан жарима ҳуқуқбузар томонидан жарима қўлланганлиги тўғрисидаги варор тақдим этилган санадан бошлаб 15 кундан кечиктирмай тўланиши шарт.