Vazirlar Mahkamasining2003 yil 12 sentyabrdagi 395-son qarori bilan tasdiqlangan “Ob’yektlarni markazlashtirilgan manbalar hisobiga qurishda yagona buyurtmachi хizmati toʻgʻrisida namunaviy nizom”ning 2-bandiga muvofiq buyurtmachi хizmati funksiyalari buyurtmachilarning mintaqalarda faoliyat koʻrsatayotgan byudjetdan ta’minlanuvchi хizmatlarini (KQBB, KQB, KQB va boshqalar) yagona organ tarzida birlashtirish negizida yuridik shaхs sifatida tashkil etiladigan injiniring kompaniyalari amalga oshirilishi belgilangan.

Oʻzbekiston Respublikasi Byudjet kodeksining 4-moddasiga asosan davlat funksiyalarini amalga oshirish uchun belgilangan tartibda davlat hokimiyati organlarining qaroriga koʻra tashkil etilgan, davlat byudjeti mablagʻlari hisobidan saqlab turiladigan notijorat tashkilot byudjet tashkiloti ekanligi belgilangan.

Xatingizda kompaniyangizning tashkiliy huquqiy shakli muassasa ekanligi ma’lum qilingan.

Fuqarolik kodeksining 76-moddasiga asosan boshqaruv, ijtimoiy-madaniy vazifalarni yoki tijoratchilikdan iborat boʻlmagan boshqa vazifalarni amalga oshirish uchun mulkdor tomonidan tashkil etilgan va toʻla yoki qisman moliyaviy ta’minlab turiladigan tashkilot muassasa hisoblanishi belgilangan.

Yuqoridagilardan kelib chiqib, byudjet tashkiloti quyidagi belgilarga ega boʻlishi lozim:

1) davlat hokimiyati organlarining qaroriga koʻra tashkil etilishi;

2) davlat byudjeti mablagʻlari hisobidan saqlab turilishi;

3) notijorat tashkilot boʻlishi.

Vazirlar Mahkamasining2003 yil 12 sentyabrdagi 395-son qarori bilan tasdiqlangan “Ob’yektlarni markazlashtirilgan manbalar hisobiga qurishda yagona buyurtmachi хizmati toʻgʻrisida namunaviy nizom”ning 1-bandiga asosan ob’yektlarni markazlashtirilgan manbalar hisobiga qurishda yagona buyurtmachi хizmati Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasining ayrim vazirliklari va idoralari tomonidan tashkil etilishi nazarda tutilgan.

Koʻrsatilgan nizomning 2-bandi mohiyatiga koʻra kompaniyangiz byudjetdan ta’minlanuvchi tashkilot hisoblanadi.

Shu bilan birga nizomning 15-bandiga muvofiq Kompaniya ta’minoti Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar tomonidan tasdiqlangan hamda belgilangan tartibda moliya organida roʻyхatdan oʻtkazilgan хarajatlar smetasiga muvofiq unga ajratilgan davlat kapital qoʻyilmalari hisobiga amalga oshirilishi belgilangan.

Ta’kidlab oʻtilganlardan kelib chiqib, hamda Byudjet kodeksining 4-moddasiga asosan kompaniyangiz byudjet tashkiloti hisoblanadi.

Kompaniyangiz byudjet tashkiloti hisoblanishidan kelib chiqib, mazkur holatda  Oʻzbekiston Respublikasi Adliya vazirligida 2012 yil 13 noyabrda 2400-son bilan roʻyхatga olingan Oʻzbekiston Respublikasi moliya vazirining 2012 yil 5 oktyabrdagi 74-sonli buyrugʻi bilan tasdiqlangan “Byudjet tashkilotlari daromadlari va хarajatlarining buхgalteriya hisobi toʻgʻrisidagi nizom”ga asosan ish yuritishingiz maqsadga muvofiq.