Вазирлар Маҳкамасининг2003 йил 12 сентябрдаги 395-сон қарори билан тасдиқланган “Объектларни марказлаштирилган манбалар ҳисобига қуришда ягона буюртмачи хизмати тўғрисида намунавий низом”нинг 2-бандига мувофиқ буюртмачи хизмати функциялари буюртмачиларнинг минтақаларда фаолият кўрсатаётган бюджетдан таъминланувчи хизматларини (КҚББ, КҚБ, КҚБ ва бошқалар) ягона орган тарзида бирлаштириш негизида юридик шахс сифатида ташкил этиладиган инжиниринг компаниялари амалга оширилиши белгиланган.

Ўзбекистон Республикаси Бюджет кодексининг 4-моддасига асосан давлат функцияларини амалга ошириш учун белгиланган тартибда давлат ҳокимияти органларининг қарорига кўра ташкил этилган, давлат бюджети маблағлари ҳисобидан сақлаб туриладиган нотижорат ташкилот бюджет ташкилоти эканлиги белгиланган.

Хатингизда компаниянгизнинг ташкилий ҳуқуқий шакли муассаса эканлиги маълум қилинган.

Фуқаролик кодексининг 76-моддасига асосан бошқарув, ижтимоий-маданий вазифаларни ёки тижоратчиликдан иборат бўлмаган бошқа вазифаларни амалга ошириш учун мулкдор томонидан ташкил этилган ва тўла ёки қисман молиявий таъминлаб туриладиган ташкилот муассаса ҳисобланиши белгиланган.

Юқоридагилардан келиб чиқиб, бюджет ташкилоти қуйидаги белгиларга эга бўлиши лозим:

1) давлат ҳокимияти органларининг қарорига кўра ташкил этилиши;

2) давлат бюджети маблағлари ҳисобидан сақлаб турилиши;

3) нотижорат ташкилот бўлиши.

Вазирлар Маҳкамасининг2003 йил 12 сентябрдаги 395-сон қарори билан тасдиқланган “Объектларни марказлаштирилган манбалар ҳисобига қуришда ягона буюртмачи хизмати тўғрисида намунавий низом”нинг 1-бандига асосан объектларни марказлаштирилган манбалар ҳисобига қуришда ягона буюртмачи хизмати Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Ўзбекистон Республикасининг айрим вазирликлари ва идоралари томонидан ташкил этилиши назарда тутилган.

Кўрсатилган низомнинг 2-банди моҳиятига кўра компаниянгиз бюджетдан таъминланувчи ташкилот ҳисобланади.

Шу билан бирга низомнинг 15-бандига мувофиқ Компания таъминоти Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, вазирликлар ва идоралар томонидан тасдиқланган ҳамда белгиланган тартибда молия органида рўйхатдан ўтказилган харажатлар сметасига мувофиқ унга ажратилган давлат капитал қўйилмалари ҳисобига амалга оширилиши белгиланган.

Таъкидлаб ўтилганлардан келиб чиқиб, ҳамда Бюджет кодексининг 4-моддасига асосан компаниянгиз бюджет ташкилоти ҳисобланади.

Компаниянгиз бюджет ташкилоти ҳисобланишидан келиб чиқиб, мазкур ҳолатда  Ўзбекистон Республикаси Адлия вазирлигида 2012 йил 13 ноябрда 2400-сон билан рўйхатга олинган Ўзбекистон Республикаси молия вазирининг 2012 йил 5 октябрдаги 74-сонли буйруғи билан тасдиқланган “Бюджет ташкилотлари даромадлари ва харажатларининг бухгалтерия ҳисоби тўғрисидаги низом”га асосан иш юритишингиз мақсадга мувофиқ.