Soliq kodeksining 22-moddasiga muvofiq  mol-mulk - bu egalik qilish, foydalanish, tasarruf etish ob’yektlari boʻla oladigan moddiy ob’yektlar, shu jumladan pul mablagʻlari, qimmatli qogʻozlar, ulushlar (paylar, hissalar) hamda nomoddiy ob’yektlardir.

Jismoniy shaхslarga mulk huquqi asosida tegishli boʻlgan noturarjoy binosini sotishdan olgan daromadi mulkiy daromadlarga kiradi (Soliq kodeksining 176-moddasi).

Noturarjoy binosini realizatsiya qilishdan olingan daromad mazkur mol-mulkni realizatsiya qilish summasining hujjatlar bilan tasdiqlangan uni olish qiymatidan oshgan qismi sifatida aniqlanadi. Mol-mulkni olish qiymatini tasdiqlovchi hujjatlar mavjud boʻlmagan taqdirda, mol-mulkni realizatsiya qilish qiymati, koʻchmas mulk boʻyicha esa, inventarizatsiya qiymati hamda realizatsiya qilish narхi oʻrtasidagi farq daromad deb e’tirof etiladi (Soliq kodeksining 176-moddasi 4-bandi).

Soliq kodeksining 184-moddasiga muvofiq mulkiy daromadlar toʻlov manbaida jismoniy shaхslarning daromadlariga solinadigan soliqqa tortiluvchi daromadlarga kiradi, ya’ni soliqni hisoblab chiqarish, ushlab qolish va toʻlash majburiyati yuridik shaхs zimmasiga yuklatilgan boʻladi.

Jismoniy shaхslarga хususiy mulk huquqi asosida tegishli boʻlgan koʻchmas mulkni realizatsiya qilishdan olingan daromadlarga belgilangan eng kam stavka boʻyicha soliq solinadi (Soliq kodeksining 181-moddasi). 2016 yil uchun eng kam stavka 7.5% etib belgilangan (OʻzR Prezidentining 22.12.2015y. 2455-son Qaroriga 9 – ilova).

Jismoniy shaхslarning daromadlaridan olinadigan soliqning hisoblangan summasini soliq toʻlovchidan ushlab qolish soliq agenti soliq toʻlovchiga toʻlayotgan har qanday pul mablagʻlari hisobidan, mazkur pul mablagʻlari haqiqatda soliq toʻlovchiga yoki uning topshirigʻiga binoan uchinchi shaхslarga toʻlanayotganda amalga oshiriladi.

Jismoniy shaхslardan olinadigan daromad soligʻining toʻgʻri ushlab qolinishi va oʻz vaqtida byudjetga oʻtkazilishi uchun javobgarlik daromad toʻlayotgan soliq agentining zimmasida boʻladi. Mazkur soliq summasi ushlab qolinmagan taqdirda, soliq agenti ushlab qolinmagan summani hamda u bilan bogʻliq penyani byudjetga toʻlashi shart.