Dastlab eslatib oʻtamizki, turli soliq solish ob’yektlari va (yoki) yagona soliq toʻlovi (YaST) stavkalari belgilangan bir necha faoliyat turlari bilan shugʻullanadigan YaSTni toʻlovchilar shu faoliyat turlari boʻyicha alohida-alohida hisob yuritishlari hamda soliq toʻlovchilarning tegishli toifalari uchun belgilangan stavkalar boʻyicha yagona soliq toʻlovini toʻlashlari kerak (Soliq kodeksining 353-moddasi).

2015 yilda savdo faoliyati bilan shugʻullanuvchi korхonalar agar yana boshqa turdagi biror faoliyatni amalga oshirsalar soliq organlariga 2 ta SYaT hisob-kitobini taqdim qilar edilar: savdo faoliyati boʻyicha – 108 kod bilan, boshqalar boʻyicha 100. 2016 yildan boshlab barcha faoliyat turlari boʻyicha yagona YaST hisob-kitobi topshiriladi. Masalan, agar hisobot davri yakuni boʻyicha ishlab chiqarish faoliyati ustunlik qilgan boʻlsa, ushbu faoliyatdan tushgan tushumni “Asosiy faoliyat turi 1” ustunda, ulgurji savdo boʻyicha tovar aylanmasini esa boshqa faoliyat turi “2” ustunda koʻrsatish kerak.

Shuningdek, eslatib oʻtamizki, YaST  Yagona soliq toʻlovining eng kam miqdori kiritilishi munosabati bilan yagona soliq toʻlovini hisoblab chiqarish va toʻlash tartibi toʻgʻrisidagi Nizomga (AV tomonidan 03.03.2011 y. 2203-son bilan roʻyхatga olingan) muvofiq, YaSTni uning eng kam miqdorini hisobga olgan holda toʻlash kerak. Agar korхonangiz yangi tashkil qilingan boʻlsa,  davlat roʻyхatidan oʻtgan sanadan boshlab  6 oy davomida YaSTning eng kam miqdorini hisobga olmasligingiz mumkin.