Mehnatga haq toʻlash muddatlari jamoa shartnomasi yoki boshqa lokal normativ hujjatda belgilanadi va har yarim oyda bir martadan kam boʻlishi mumkin emas (OʻzR Mehnat kodeksining 161-moddasi 1-qismi).

Oʻz navbatida, mazkur Kodeksning 1-moddasi 1-qismga koʻra, Oʻzbekiston Respublikasida mehnatga oid munosabatlar mehnat toʻgʻrisidagi qonun hujjatlari, jamoa kelishuvlari, shuningdek jamoa shartnomalari va boshqa lokal normativ hujjatlar bilan tartibga solinadi.

Demak, agarda jamoa shartnomasi yoki boshqa lokal normativ hujjatda ish beruvchining хodimga oldindan haq toʻlash huquqi nazarda tutilgan boʻlmasa, хodimga oldindan 3 oylik ish haqini toʻlash notoʻgʻri boʻladi.

Shu bilan birga, Kodeksning 4-moddasiga binoan хodimlar uchun mehnat huquqlarining va kafolatlarining eng past darajasi qonunlar bilan belgilab qoʻyiladi.

Qonunlardagiga nisbatan qoʻshimcha, ya’ni imtiyozli va kengroq mehnat huquqlari va kafolatlari boshqa normativ hujjatlar, shu jumladan shartnoma yoʻsinidagi hujjatlar (jamoa kelishuvlari, jamoa shartnomalari, boshqa lokal hujjatlar), shuningdek хodim va ish beruvchi oʻrtasida tuzilgan mehnat shartnomalari bilan belgilanishi mumkin.

Ya’ni, ish beruvchi yoki хodimlarning vakillik organi tashabbusi bilan jamoa shartnomasiga oʻzgartirishlar kiritilib, хodimlarga ish haqini oldindan berish holatlari va tartibi koʻrsatilishi mumkin.

Bundan tashqari, ish beruvchi oʻz хodimiga OʻzR Fuqarolik kodeksining 732-moddasiga asosan qarz berish shartnomasini tuzish orqali kerak boʻlgan miqdorda pul mablagʻlarini ajratish, pulni ish haqi hisobidan ushlab qolish imkoniyatiga ega.