Mehnat kodeksining 31-moddasida avvalgi jamoa shartnomasi amal qilish muddati tugashiga qadar uch oy mobaynida yoki bu hujjatlar bilan belgilab qoʻyilgan muddatda har qaysi taraf boshqa tarafga yangi jamoa shartnomasini, kelishuvini tuzish yuzasidan muzokaralar boshlash toʻgʻrisida yozma хabar berishga haqli ekanligi belgilangan.

Shu bilan birga ushbu kodeksning 41-moddasida jamoa shartnomasi imzolangan vaqtdan e’tiboran yoki jamoa shartnomasida koʻrsatilgan kundan boshlab kuchga kirishi hamda taraflar belgilagan muddat davomida amal qilishi nazarda tutilgan. Shuningdek belgilangan muddat tugagach, jamoa shartnomasi taraflar yangi shartnoma tuzguncha yoki amaldagi shartnomani oʻzgartirguncha, toʻldirguncha amalda boʻlishi oʻrnatib qoʻyilgan.

Yuqoridagilardan kelib chiqadiki, jamoa shartnomasini amal qilish muddati tugagach uch oy mobaynida har qaysi taraf boshqa tarafga yangi jamoa shartnomasini tuzish yuzasidan muzokaralar boshlash toʻgʻrisida yozma хabar berish taraflarning huquqi sifatida belgilangan. Shuning uchun taraflar yangi shartnoma tuzish yoki tuzmaslikni oʻzlari hal qilishlari joiz. Agarda yangi shartnoma tuzmagan taqdirda amaldagi shartnoma oʻz kuchida qoladi.