Tomonlar kelishuviga erishgan va mehnat shartnomasiga kiritgan mehnat shartlari mehnat shartnomasi shartlariga aylanadi hamda umumiy qoidaga koʻra, ularni faqat хodim va ish beruvchining ikki tomonlama roziligi bilangina oʻzgartirish mumkin (MKning 88-moddasi).
Murojaatingizda хodimning mehnat vazifalarini oʻzgartirmagan holda, mehnat shartnomasining muddati muayyan muddatdan nomuayyan mudatga oʻzgartirish boʻyicha taklifi bilan ish beruvchi chiqganligini e’tiborga olib, хodim ish beruvchining taklifi boʻyicha rozilik bildirsa u holda bu holat boshqa doimiy ishga oʻtkazish asosida rasmiylashtirilishi mumkin (MKning 92-moddasi). Buning uchun хodim tegishli ariza berishi va ish beruvchining roziligini tasdiqlab olishi kerak.
Mehnat shartnomasini oʻzgartirishni rasmiylashtirish quyidagi tartib asosida olib boriladi:
Doimiy boshqa ishga oʻtkazish ish beruvchining buyrugʻi bilan rasmiylashtiriladi. Boshqa doimiy ishga oʻtkazish haqida buyruq chiqarish uchun хodim bilan tuzilgan mehnat shartnomasiga kiritilgan oʻzgarishlar asos boʻladi.
Doimiy boshqa ishga oʻtkazish haqidagi buyruq mehnat shartnomasiga kiritilgan oʻzgarishlarning mazmuniga toʻla muvofiq holda chiqariladi va хodimga ma’lum qilinib, tilхat olinadi (MKning 96-moddasi).
Bu holatni rasmiylashtirish muddatli mehnat shartnomasini muddati tugagunga qadar amalga oshirilishi zarur.
Javoblar ular e’lon qilingan sanada dolzarb hisoblanadi.