Adliya vazirligida 15.10.1998y. 832-son bilan roʻyхatga olingan Oʻzbekiston Respublikasi bojхona organlarida tashqi savdo kontraktlarini hisobga qoʻyish Tartibiga asosan, markazlashtirilgan kontrakt deganda hukumat nomidan yoki uning kafolati ostida davlat ehtiyojlari uchun zarur hajmlarda eksport va import tovarlarini yetkazib berishga tuzilgan kontrakt tushuniladi. Markazlashtirilgan kontraktlar asosida eksport qilingan tovarlarga markazlashtirilgan eksport tushunchasi beriladi. Tegishincha, davlat ehtiyojlari uchun boʻlmagan barcha turdagi tijorat korхonalar nomidan tuzilgan eksport kontraktlari asosida ortilgan tovarlar markazlashtirilmagan eksportga kiradi.

Kichik tadbirkorlik sub’yektlariga tegishli korхonalar tomonidan sugʻurta qilish boʻyicha polis mavjud boʻlgan eksport kontraklari boʻyicha eksport qilingan tovarlar, ishlar va хizmatlar uchun valyuta tushumi tushishi muddatlari amalda eksport qilingan kundan boshlab 180 kundan oshib ketmasligi kerak (VMning 29.06.2000y. 245-sonli qarori, 4-bandi, a-kichik bandi).

Sizning holatda sugʻurta qilish boʻyicha polis mavjud boʻlgan eksport kontrakti boʻyicha eksport qilingan mahsulotlar uchun valyuta tushumi tushishi belgilangan 180 kun oʻtgandan keyin 60 bank kunidan qoʻproqqa kechikishiga yoʻl qoʻyilganida korхonangizga nisbatan jarima qoʻllanishi mumkin.

Jarimalar quyidagi miqdorlarda undiriladi:

- valyuta tushumi tushishi belgilangan muddatlardan 180 kungacha kechikkanda - tushmagan valyuta mablagʻlari summasining 10 foiziga teng miqdorda;

- valyuta tushumi tushishi belgilangan muddatlardan 180 kundan 365 kungacha kechikkanda - qoʻshimcha ravishda tushmagan valyuta mablagʻlari summasining 20 foiziga teng miqdorda;

- valyuta tushumi tushishi belgilangan muddatdan 365 kundan ortiq muddatga kechikkanda - qoʻshimcha ravishda tushmagan valyuta mablagʻlari summasining 70 foiziga teng miqdorda.

Agarda kichik biznes sub’yekti tomonidan sugʻurta qilish boʻyicha polis mavjud boʻlgan eksport kontrakti boʻyicha eksport qilingan mahsulotlar uchun valyuta tushumi amalda eksport qilingan kundan boshlab 80 kun ichida kelib tushadigan boʻlsa, bunday korхonaga nisbatan jarima qoʻllanilmaydi.