Адлия вазирлигида 15.10.1998й. 832-сон билан рўйхатга олинган Ўзбекистон Республикаси божхона органларида ташқи савдо контрактларини ҳисобга қўйиш Тартибига асосан, марказлаштирилган контракт деганда ҳукумат номидан ёки унинг кафолати остида давлат эҳтиёжлари учун зарур ҳажмларда экспорт ва импорт товарларини етказиб беришга тузилган контракт тушунилади. Марказлаштирилган контрактлар асосида экспорт қилинган товарларга марказлаштирилган экспорт тушунчаси берилади. Тегишинча, давлат эҳтиёжлари учун бўлмаган барча турдаги тижорат корхоналар номидан тузилган экспорт контрактлари асосида ортилган товарлар марказлаштирилмаган экспортга киради.

Кичик тадбиркорлик субъектларига тегишли корхоналар томонидан суғурта қилиш бўйича полис мавжуд бўлган экспорт контраклари бўйича экспорт қилинган товарлар, ишлар ва хизматлар учун валюта тушуми тушиши муддатлари амалда экспорт қилинган кундан бошлаб 180 кундан ошиб кетмаслиги керак (ВМнинг 29.06.2000й. 245-сонли қарори, 4-банди, а-кичик банди).

Сизнинг ҳолатда суғурта қилиш бўйича полис мавжуд бўлган экспорт контракти бўйича экспорт қилинган маҳсулотлар учун валюта тушуми тушиши белгиланган 180 кун ўтгандан кейин 60 банк кунидан қўпроққа кечикишига йўл қўйилганида корхонангизга нисбатан жарима қўлланиши мумкин.

Жарималар қуйидаги миқдорларда ундирилади:

- валюта тушуми тушиши белгиланган муддатлардан 180 кунгача кечикканда - тушмаган валюта маблағлари суммасининг 10 фоизига тенг миқдорда;

- валюта тушуми тушиши белгиланган муддатлардан 180 кундан 365 кунгача кечикканда - қўшимча равишда тушмаган валюта маблағлари суммасининг 20 фоизига тенг миқдорда;

- валюта тушуми тушиши белгиланган муддатдан 365 кундан ортиқ муддатга кечикканда - қўшимча равишда тушмаган валюта маблағлари суммасининг 70 фоизига тенг миқдорда.

Агарда кичик бизнес субъекти томонидан суғурта қилиш бўйича полис мавжуд бўлган экспорт контракти бўйича экспорт қилинган маҳсулотлар учун валюта тушуми амалда экспорт қилинган кундан бошлаб 80 кун ичида келиб тушадиган бўлса, бундай корхонага нисбатан жарима қўлланилмайди.