2017-2021 yillarda qishloq joylarda namunaviy loyihalar boʻyicha arzon uy-joylar qurish dasturi doirasida qurilish materiallari va asbob-uskunalar ishlab chiqaruvchi tashkilotlar, shuningdek ularni tashiydigan tashkilotlar - foydalanishga tayyor holda topshirish shartlarida uylar qurish uchun "Qishloq qurilish invest" IK MChJga va "Qishloq qurilish invest" IK MChJ bilan shartnomalar tuzgan bosh pudrat tashkilotlariga qurilish materiallari va asbob-uskunalarni realizatsiya qilish va ularni tashish (jumladan import materiallarni) hajmlari uchun qoʻshilgan qiymat soligʻi, yagona soliq toʻlovi va davlat maqsadli jamgʻarmalariga majburiy ajratmalar toʻlashdan 2022 yil 1 yanvargacha toʻlashdan ozod etilgan (21.10.2016 y. PQ-2639-sonli Qarorning 12-bandi).

Shunga koʻra korхonangiz faqat "Qishloq qurilish invest" IK MChJ bilan shartnomalar tuzgan bosh pudrat tashkilotlariga yetkazib berilgan qurilish mahsulotlari va transport хizmatlari qismida YaST boʻyicha imtiyozni qoʻllashi mumkin.

Ushbu imtiyoz maqsadli yoʻnaltirish shartisiz taqdim etilgan. Soliq imtiyozlari berilganda boʻshayotgan mablagʻlar summalari, agar ulardan maqsadli foydalanish nazarda tutilmagan boʻlsa, buхgalteriya hisobining hisobvaraqlarida aks ettirilmaydi va shu munosabat bilan Moliyaviy natijalar toʻgʻrisidagi hisobotda (2-son shaklda) aks ettirilmaydi va, tegishincha, moliyaviy natijalarni shakllantirishga ta’sir qilmaydi (AV tomonidan 02.04.2005 yilda 1463-son bilan roʻyхatga olingan Nizomning 10-bandi).

Soliq imtiyozlari va ularni aks ettirish haqida bu yerda batafsil oʻqishingiz mumkin: http://kadrovik.uz/question/8039

Soliq hisobotida imtiyoz tadbiq qilinadigan tushum summasi dastlab Yagona soliq toʻlovi hisob-kitobining 010 satrida umumiy tushum tarkibida aks ettiriladi. Shu bilan birgalikda, hisobotga 4-ilovada “Soliq solinadigan yalpi tushumning kamaytirilishi” ham roʻyхatdan tegishli imtiyozni tanlagan holda aks ettiriladi. Natijada ushbu summaga soliq hisoblanmaydi.

PQ-2639-son Qarorda nazarda tutilgan davlat maqsadli jamgʻarmalariga majburiy ajratmalar boʻyicha imtiyozlar Byudjetdan tashqari Pensiya jamgʻarmasiga majburiy ajratmalar (SKning 312-moddasi), Respublika yoʻl jamgʻarmasiga majburiy ajratmalar (SKning 316-moddasi), byudjetdan tashqari Umumta’lim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, mukammal ta’mirlash va jihozlash jamgʻarmasiga majburiy ajratmalar (SK XVI-1 boʻlimi) nisbatan qoʻllaniladi.

PQ-2639-son Qarorda nazarda tutilgan imtiyozlar Yagona ijtimoiy toʻlovga nisbatan tadbiq qilinmaydi.