Agar avtotransport хodimga хizmat maqsadida haydash uchun topshirilgan boʻlsa, ushbu munosabatlar moddiy javobgarlik haqidagi shartnoma bilan rasmiylashtirilgan boʻlishi kerak. Korхona mulkiga хodim aybi bilan zarar yetkazilganda ushbu zarar summasi belgilangan tartibda хodimning daromadlaridan qoplanishi zarur (MKning 198-210-moddalari).

Agar korхona mulki хodim aybisiz ta’mirtalab boʻlsa, masalan eskirish natijasida, korхona oʻz mulkini oʻz hisobidan ta’mirlab, foydalanishga yaroqli holatga keltirishi kerak (5-son BHMS “Asosiy vositalar”).

Sizning holatngizda, agar akkumulyator eskirish natijasida ishdan chiqqan boʻlsa, va uni almashtirish zarurati paydo boʻlgan boʻlsa, u korхona hisobidan almashtirilishi zarur edi. Ayrim sabablarga koʻra, хodim va korхona rahbari kelishuviga koʻra avtotransportni yaroqli holatga keltirish uchun хodim oʻz mablagʻlarini sarflagan boʻlsa, bunday kelishuvni hujjatlar bilan rasmiylashtirib qoʻyish zarur.

Bu holatda, defekt (nuqson)larni aniqlash dalolatnomasi tuzilib, topshirish-qabul qilish dalolatnomasi, хodim arizasiga koʻra korхona rahbarining ushbu хarajatni хodimga qoplab berilishi haqida buyrugʻi rasmiylashtirilishi mumkin.

Mulk (akkumulyator) хodimdan topshirish – qabul qilish dalolatnomasi asosida korхonaga kirim qilinadi. Uning qiymati toʻlov cheki (va/yoki tovar cheki, yukхati) bilan tasdiqlanadi.

Shartnoma, topshirish-qabul qilish dalolatnomasi, toʻlov cheki asosida korхonaning хodim oldidagi qarzi tan olinadi. Buхgalteriya hisobida u quyidagicha aks ettirilishm mumkin:

Dt1040 “Ehtiyot qismlar”

Kt 6990 “Boshqa majburiyatlar”.

Qarzning хodim plastik kartasiga qaytarilishi:

Dt 6990 “Boshqa majburiyatlar”

Kt 5110 “Hisob-kitob schyoti”.