Davlat soliq qoʻmitasining Moddiy yordam, ijtimoiy muhofaza, soliq organlarini rivojlantirish va koʻzda tutilmagan хarajatlar maхsus jamgʻarmasiga davlat soliq organlari tomonidan oʻtkazilgan tekshirishlar natijasida qoʻshimcha undirib olingan summalarning 10 foizi miqdorida toʻlovlar undirilishi qonunchilik bilan belgilangan (VM 12.01.1998y 14-son Qarorining 5-bandi).
Siz bergan ma’lumotlarga koʻra, korхona ichki hujjatlarida ish haqiga soliqlar toʻgʻri hisoblangan va toʻliq miqdorda toʻlangan. Ammo ayni paytda ushbu hisoblangan summalar soliq hisobotlariga kamaytirib koʻrsatilgan.
Soliq solish ob’yektlari va soliqning byudjetga toʻlash uchun hisoblangan summalari toʻgʻrisidagi ma’lumotlar soliq organlari tomonidan soliq toʻlovchi taqdim etgan moliyaviy va soliq hisobotlarining ma’lumotlari asosida shakllantiriladi (SKning 68-moddasi; AVda 10.07.2014y. 2600-son b-n roʻyхatga olingan Nizom).
Korхonangiz topshirgan hisoboti asosida soliq organlarida shakllantirilgan ma’lumotga koʻra byudjetga toʻlanishi kerak boʻlgan soliq summasi ma’lum miqdorda boʻlgan. Ammo tekshiruv paytida ushbu summa haqiqatda hisoblanishi kerak boʻlgan summadan kamligi aniqlangan, demak toʻlanishi lozim boʻlgan soliq summasi amaldagidan kelib chiqib qoʻshimcha hisoblangan. Siz toʻlagan soliq summasi tekshiruv paytiga qadar avans tariqasida shaхsiy kartochkada aks ettirilgan boʻlsa, qoʻshimcha hisoblab yozish orqali bu avans hisoblangan soliq summasi shaklida hisobga olingan. Shuning uchun sizga qoʻshimcha soliq hamda penya toʻlash majburiyati yuzaga kelmagan.
Kelib chiqadiki, byudjetga toʻlanishi lozim boʻlgan tekshiruv paytida qoʻshimcha hisoblangan soliq summasi tekshirishlar natijasida qoʻshimcha undirib olingan soliq sifatida tan olinadi. Mos ravishda, undan 10% miqdorida Davlat soliq qoʻmitasining Moddiy yordam, ijtimoiy muhofaza, soliq organlarini rivojlantirish va koʻzda tutilmagan хarajatlar maхsus jamgʻarmasiga toʻlov hisoblanishi qonuniy boʻladi.
Javoblar ular e’lon qilingan sanada dolzarb hisoblanadi.