MChJ yilning har choragida, yarim yilda bir marta yoki bir yilda bir marta oʻzining sof foydasini jamiyat ishtirokchilari oʻrtasida taqsimlash toʻgʻrisida qaror qabul qilishga haqli. Jamiyat ishtirokchilari oʻrtasida taqsimlanadigan foydasi qismini aniqlash toʻgʻrisidagi qaror jamiyat ishtirokchilarining umumiy yigʻilishi tomonidan qabul qilinadi («Mas’uliyati cheklangan hamda qoʻshimcha mas’uliyatli jamiyatlar toʻgʻrisida»gi Qonunning  25- moddasi).

Jamiyat oʻz ishtirokchilari oʻrtasida taqsimlanishi toʻgʻrisida qaror qabul qilingan foydani toʻlashi shart. Ammo ularni toʻlab berish muddatlari qonunchilikda belgilanmagan.

Shuning uchun, agar 2017 yilda hisoblangan dividendlar 2017 yil yakunigacha ta’sischilarga toʻliq toʻlab berilmagan boʻlsa, ularning qoldiq summasi kelgusi yillarda toʻlab berilishi mumkin.

Dividendlar summasidan toʻlov manbaida olinadigan foyda soligʻi ularni toʻlash paytida ushlab qolinadi va ushbu muddatdan kechiktirmay byudjetga oʻtkazib beriladi (SKning 165-moddasi).