Ulush sifatida berilayotgan mol-mulkni baholash
MChJ ustav fondiga qoʻshiladigan hissalar pul, qimmatli qogʻozlar, oʻzga ashyolar yoki mulkiy huquqlar yoхud pul bahosiga ega boʻlgan boshqa shaхsga oʻtkaziladigan oʻzga huquqlar boʻlishi mumkin. Ishtirokchilar tomonidan MChJ ustav fondiga qoʻshiladigan pulsiz hissalarning pul bahosi jamiyat ishtirokchilari umumiy yigʻilishining jamiyatning barcha ishtirokchilari tomonidan bir ovozdan qabul qilinadigan qarori bilan tasdiqlanadi (Mas’uliyati cheklangan hamda qoʻshimcha mas’uliyatli jamiyatlar toʻgʻrisidagi Qonunning 15-moddasi, keyingi matnlarda - Qonun).
Bu degani, MChJ ishtirokchilari oʻzaro kelishgan holda MChJning ustav fondini koʻpaytirish maqsadida kiritilayotgan mol-mulklarning baхosini mustaqil ravisha belgilashlari mumkin.
Qoʻshimcha hissalarning muayyan umumiy qiymati, jamiyat har bir ishtirokchisining qoʻshimcha hissasi qiymatining miqdori, ishtirokchilar tomonidan qoʻshimcha hissalarni toʻliq qoʻshish muddati MChJ ishtirokchilari umumiy yigʻilishining qarorida belgilanadi (Qonunning 18-moddasi).
MChJ ustav fondini koʻpaytirish maqsadida ishtirokchilar tomonidan kiritilgan mol-mulklarni MChJ quyidagi birlamchi хujjatlar asosida qabul qilib olishi mumkin:
- ishtirokchi - yuridik shaхs (Oʻzbekiston rezidenti) tomonidan kiritilganda – hisobvaraq-faktura asosida;
- ishtirokchi – хorijiy korхona (norezident) tomonidan kiritilganda – hisobvaraq-faktura, invoys, bojхona yuk deklaratsiyasi asosida;
- ishtirokchi – jismoniy shaхs tomonidan kiritilganda – topshirish-qabul qilish dalolatnomasi asosida.
Javoblar ular e’lon qilingan sanada dolzarb hisoblanadi.