МЧЖ устав фондига қўшиладиган ҳиссалар пул, қимматли қоғозлар, ўзга ашёлар ёки мулкий ҳуқуқлар ёхуд пул баҳосига эга бўлган бошқа шахсга ўтказиладиган ўзга ҳуқуқлар бўлиши мумкин. Иштирокчилар томонидан МЧЖ устав фондига қўшиладиган пулсиз ҳиссаларнинг пул баҳоси жамият иштирокчилари умумий йиғилишининг жамиятнинг барча иштирокчилари томонидан бир овоздан қабул қилинадиган қарори билан тасдиқланади (Масъулияти чекланган ҳамда қўшимча масъулиятли жамиятлар тўғрисидаги Қонуннинг 15-моддаси, кейинги матнларда - Қонун).

Бу дегани, МЧЖ иштирокчилари ўзаро келишган ҳолда МЧЖнинг устав фондини кўпайтириш мақсадида киритилаётган мол-мулкларнинг бахосини мустақил равиша белгилашлари мумкин.

Қўшимча ҳиссаларнинг муайян умумий қиймати, жамият ҳар бир иштирокчисининг қўшимча ҳиссаси қийматининг миқдори, иштирокчилар томонидан қўшимча ҳиссаларни тўлиқ қўшиш муддати МЧЖ иштирокчилари умумий йиғилишининг қарорида белгиланади (Қонуннинг 18-моддаси).

МЧЖ устав фондини кўпайтириш мақсадида иштирокчилар томонидан киритилган мол-мулкларни МЧЖ қуйидаги бирламчи хужжатлар асосида қабул қилиб олиши мумкин:

• иштирокчи - юридик шахс (Ўзбекистон резиденти) томонидан киритилганда – ҳисобварақ-фактура асосида;
• иштирокчи – хорижий корхона (норезидент) томонидан киритилганда – ҳисобварақ-фактура, инвойс, божхона юк декларацияси асосида;
• иштирокчи – жисмоний шахс томонидан киритилганда – топшириш-қабул қилиш далолатномаси асосида.