Пригодится каждому кадровику в июле:
Ташкилот 56 ёшли аёлни бош бухгалтер лавозимига ишга қабул қилди. Расмийлаштириш чоғида ундан стандарт ҳужжатлар тўплами – паспорт, меҳнат дафтарчаси, диплом нусхасини талаб қилдилар. Меҳнат шартномасини тузгач иш берувчи тиббий кўрикни ташкил этиши кераклигини «эслаб қолдилар». Буни «ўтган сана билан» амалга ошириш мумкинми?
– Тиббий кўрик – айрим тоифадаги ходимларни ишга қабул қилишнинг асосий шартларидан бири. Бундай ходимлар рўйхати МК 214-м. келтирилган:
- 18 ёшга тўлмаган шахслар;
- 60 ёшга тўлган эркаклар, 55 ёшга тўлган аёллар;
- ногиронлар;
- меҳнат шароити ноқулай ишларда, тунги ишларда, шунингдек транспорт ҳаракати билан боғлиқ ишларда банд бўлган шахслар;
- озиқ-овқат саноатида, савдо ва бевосита аҳолига хизмат кўрсатиш билан боғлиқ бўлган бошқа тармоқлардаги ишларда банд бўлган ходимлар;
- умумтаълим мактаблари, мактабгача таълим ташкилотлари ва бошқа муассасаларнинг бевосита болаларга таълим ёки тарбия бериш билан машғул бўлган педагог ва бошқа ходимлари.
Иш берувчи уларни дастлабки тиббий хулосасиз ишга қабул қилишга ҳақли эмас.
Ходимларни тиббий кўрикдан ўтказиш тартиби соғлиқни сақлаш вазирининг буйруғи билан белгиланган, АВ рўйхат рақами 2387, 29.08.2012 й.
Иш берувчи учун оқибатлар
Мажбурий дастлабки тиббий кўрикдан ўтмаган шахснинг меҳнат вазифаларини бажаришига рухсат бериш иш берувчининг мансабдор шахсини МЖТКнинг 49-м. бўйича маъмурий жавобгарликка тортишга олиб келиши мумкин.
Хатони тузатиш тартиби
Номзод тиббий кўрикдан ўтиши учун унга даволаш-профилактика муассасасига йўлланма беринг. Ушбу йўлланма шакли 2387-сон низомга 6-илова билан тасдиқланган.
Ижобий тиббий хулосага асосланиб меҳнат шартномасини расмийлаштиринг.
Тиббий кўрикдан ўтиш пайтида ходимни ишдан озод этиб, ушбу давр учун кафолатли тўловларни тўланг. Уларнинг миқдори жамоа шартномасида белгилаб қўйилади, бироқ у ўртача иш ҳақидан кам бўлмаслиги керак 
.
