Ходим "йўқолиб" қолса

preview

"Ходим ишга келмай қўйди, телефон қўнғироқлари ва электрон алоқа воситалари орқали йўлланган саволларга жавоб бермаяпти. Бу вазиятда иш берувчи қандай йўл тутиши керак? Ишга келмаслик сабабларини аниқлаштириш бўйича қандай тартиб-таомиллардан сўнг Меҳнат кодексининг 100-модда 2-қисм 4-банди бўйича – меҳнат вазифаларини қўпол равишда бузганлик учун меҳнат шартномасини бекор қилиш мумкин? Ишда бўлмаган ходим билан меҳнат шартномасини бекор қилмасдан ушбу лавозимга бошқа ходимни қабул қилса бўладими?".

 

- Аниқланмаган сабабларга кўра ишда узоқ вақт бўлмаган ходимнинг ўрнига муддатли меҳнат шартномаси бўйича янги ходимни қабул қилишингиз мумкин . Бунда ишга қабул қилиш шартномаси ва буйруқда у иш жойи сақланиб қоладиган асосий ходимнинг йўқлиги даврида қабул қилинишини кўрсатинг.

Муқобил вариант – шу ташкилотнинг бошқа доимий ходимига унинг розилиги билан бир неча касбда ишлашни расмийлаштириш .

Агар ходим узрли сабабларсиз узоқ вақт ишга келмаса (прогул), ундан ёзма тушунтириш олиш чораларини кўринг . Бунинг учун  шахсий Т-2 картасида кўрсатилган манзилга почта хабарномаси ёки телеграмма юборинг. Билдиришномада ходимга маълум муддат ичида ундан жавоб олинмаса, иш берувчи Меҳнат кодексининг 181-моддасига мувофиқ меҳнат шартномаси бекор қилинишига сабаб бўладиган интизомий жазо қўллаш ҳуқуқидан фойдаланиши ҳақида хабар беринг.

Шунингдек,  ташкилот ходимлари орасидан иш берувчининг вакилларини ходимнинг яшаш жойига юборишингиз мумкин,  улар билдиришномани шахсан қўлга топширадилар ва жойида тушунтириш оладилар. Ходимнинг ўзи бўлмаса, оила аъзолари билан суҳбатлашишади. Ташриф натижаларини далолатнома билан ҳужжатлаштиринг.

Ходимнинг ишда йўқлиги факти ҳам ҳужжатлаштирилиши керак. Ходимнинг иш жойида йўқлигини ҳар бир кун учун ҳужжатлаштирган маъқул. Буни "орқа сана билан" эмас, балки ўша куннинг ўзида қилишни тавсия этамиз. Шунингдек, ишдан бўшатиш фактини бошқа далиллар билан тасдиқлаш мумкин (ходимларнинг ишга келиш-кетиш журналида ходимнинг имзоси йўқлиги, ёзма шаклда расмийлаштирилган гувоҳлар кўрсатмаси, автоматлаштирилган кириш тизимидаги маълумотлар, тўғридан-тўғри раҳбарнинг ҳисоботлари ва бошқалар.). Шунингдек, иш соатини ҳисоблаш  жадвалида ишга келмаган вақтни қайд этиш керак.

Агар ходим белгиланган муддатдан кейин тушунтириш бермаса (хабарномани почта орқали етказиб бериш учун қўшимча бир неча кун), бу ҳақида далолатнома тузинг.

Шунингдек, ушбу даврда вақтинча ишга лаёқатсизлик варақасини олиш учун мурожаат қилган-қилмаганлигини билиш учун ходимнинг яшаш жойидаги поликлиникага ёзма сўров юбориш мақсадга мувофиқ.

Агар ходим хат (телеграмма) олган ва бу ҳақида почта хабарномасида белги қўйилган бўлса, лекин у шунда ҳам ишга келмаса ҳамда белгиланган муддат ичида прогул учун тушунтириш бермаса, иш берувчи  Меҳнат кодексининг 100-модда 2-қисм 4-банди бўйича – меҳнат вазифаларини бир марта қўпол равишда бузганлик учун меҳнат шартномасини бекор қилиш ҳуқуқига эга.

Эътибор беринг
Ходимни шу асосда ишдан бўшатиш учун ташкилот ходимларнинг вакиллик органи билан ички меҳнат қоидаларини тасдиқлаши ва мувофиқлаштириши керак. Уларда узрли сабабларсиз прогул ишдан бўшатишга асос бўлувчи бир марталик қўпол бузилишлар рўйхатига киритилиши керак.

 

 Ишдан бўшатиш тўғрисида ходимни огоҳлантиришни (камида 3 кун олдин) иш берувчи ўз истагига кўра мутаносиб пуллик компенсация билан алмаштиришга ҳақли .

Ташкилотингизнинг жамоа шартномаси шуни талаб қилса, ходимларнинг вакиллик органи розилигини олишни унутманг .

"Прогулчи" меҳнат шартномасини бекор қилиш тўғрисида буйруқ чиқадиган куни ҳам келмаса, у билан меҳнат муносабатлари ишга чиқмаган биринчи кундан бошлаб бекор қилинади .

Меҳнат кодексининг 108-моддасида талаб қилинганидек ходимга ишдан бўшатиш кунида буйруқ нусхаси ва меҳнат дафтарчасини беришнинг имкони йўқлиги сабабли, ходимга ҳужжатлар учун келиш ёки уларни почта орқали юборишга розилик бериш зарурлиги тўғрисида почта орқали хабар юборинг. Кўрсатилган билдиришнома юборилган кундан бошлаб иш берувчи меҳнат дафтарчасини беришни кечиктирганлик учун жавобгарликдан озод этилади .


Меҳнат шартномасини бекор қилиш Меҳнат шартномасини бекор қилиш Меҳнат шартномасини бекор қилиш /publish/doc/text179744_hodim_yuqolib_qolsa