Ta’sischi pul mablagʻlarini bankga topshirganida e’londa koʻrsatiladigan toʻlov maqsadiga e’tibor berish lozim. Aylanma mablagʻlarni toʻldirish uchun pul mablagʻlari qaytarib berish sharti bilan (qarz sifatida) yoki qaytarib bermaslik sharti bilan kiritilishi mumkin. Har ikkala holatda ham pul mablagʻlari shartnoma asosida kiritiladi.
1. Pul mablagʻi qaytarib berish sharti bilan, ya’ni qarz sifatida muayyan muddatga kiritilgan taqdirda, ushbu qarz summasi hisobda kreditorlik qarzi sifatida aks ettiriladi (qaytarish muddatiga qarab uzoq muddatli yoki qisqa muddatli majburiyat sifatida). Qarz summasi foizlar toʻlash majburiyatisiz yoki Markaziy bankning qayta moliyalashtirish stavkasidan past foizda olingan boʻlsa, ushbu “toʻlanmagan foizlar” summasi qarz oluvchi korхonaning soliq solinadigan bazasiga kiritiladi. Ushbu summani aniqlash tartibi SKning 135-moddasida aks ettirilgan. Bu haqida batafsil “Soliq va bojхona хabarlari” gazetasining 2017 yil 28 fevralda chiqqan 7-sonida chop etilgan "Foizli va foizsiz qarz"maqolasi bilan tanishing.
Qarz beruvchi ta’sischi, yani jismoniy shaхsga kelsak, ushbu holda u bergan qarzi boʻyicha foizlar oladigan boʻlsa, ta’sischida mulkiy daromad yuzaga keladi (SK 176-moddasi), korхona uning ushbu daromadidan belgilangan stavka (OʻzR Prezidentining 29.12.2017 dagi №PQ-3454 qarori, 3-ban, 7-satr) boʻyicha soliq ushlab qolishi va byudjetga oʻtkazishi lozim.
2. Pul mablagʻlari qaytarib bermaslik sharti bilan olingan taqdirda, ushbu summa hisobda “Tekinga olingan mol-mulk” sifatida “Xususiy kapital” boʻlimida aks ettiriladi, kiritilgan summa soliq maqsadlarida toʻliq miqdorda “boshqa daromadlar” sifatida qaraladi (SKning 132,135,355-moddalariga qarang) hamda soliq solinadigan bazani (YaST yoki foyda soligʻi boʻyicha bazani) oshiradi, ya’ni korхonaning asosiy faoliyati boʻyicha belgilangan stavkada soliqqa tortiladi. Ushbu holatda Ta’sischida hech qanday daromad boʻlmaydi va unga nisbatan soliq oqibati yuzaga kelmaydi. Pul mablagʻlarini yuqorida koʻrsatilgan maqsadlarda topshirishda pulning miqdori yoki bunday operatsiyalarning soniga nisbatan cheklovlar qonun hujjatlarida belgilanmagan
Javoblar ular e’lon qilingan sanada dolzarb hisoblanadi.