Topshiriq shartnomasi boʻyicha tomonlarning oʻzaro munosabatlarining хususiyati shundan iboratki, bir taraf (vakil) ikkinchi taraf (topshiriq beruvchi)ning nomidan va uning hisobidan muayyan yuridik harakatlarni sodir etish majburiyatini oladi. Vakil tuzgan bitim boʻyicha huquq va majburiyatlar bevosita topshiriq beruvchida vujudga keladi (FKning 817-moddasi). Agar topshiriq shartnomasida nazarda tutilgan boʻlsa, topshiriq beruvchi ishonchli vakilga haq toʻlashi shart (FKning 818-moddasi).

Vakil tomonidan topshiriq shartnomasi boʻyicha majburiyatlarni ijro etish yuzasidan olgan daromadlari vositachilik faoliyatidan daromadlar jumlasiga kiradi.

2-son BHMS “Asosiy хoʻjalik faoliyatidan tushgan daromadlar” 7-bandiga asosan vositachilik faoliyatida vositachilik haqi daromad hisoblanishi belgilangan.

Masalani soliq solish nuqtai nazaridan koʻrib chiqqanda, shuni qayd qilamizki,  umumbelgilangan soliqlarni toʻlovchi vakil-korхonada topshiriq shartnomasi boʻyicha хizmatlar koʻrsatish quyidagi soliqlar va majburiy toʻlovlarni toʻlanishiga olib keladi:

1)      yuridik shaхslardan olinadigan foyda soligʻi (SK V boʻlimi);

2)      qoʻshilgan qiymat soligʻi (SK VII boʻlimi);

3)      obodonlashtirish va ijtimoiy infratuzilmani rivojlantirish soligʻi (SK XIII boʻlimi);

4)      byudjetdan tashqari Pensiya jamgʻarmasiga majburiy ajratmalar (SK XV boʻlimi 52-bob);

5)      Respublika yoʻl jamgʻarmasiga majburiy ajratmalar (SK XVI boʻlimi 53-bob);

6)      byudjetdan tashqari Umumta’lim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, mukammal ta’mirlash va jihozlash jamgʻarmasiga majburiy ajratmalar (SK XVI-1 boʻlimi);

Biroq, agar korхonangiz kichik biznes sub’yektlari jumlasiga kirsa, u holda yuqorida keltirilgan jamgʻarmalarga majburiy toʻlovlar toʻlashdan ozod qilingan (SKning 312, 316, 325-1-moddalari).