“Ulgurji savdo korхonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibi toʻgʻrisidagi Nizom” (14.01.2015 yilda 2065-son bilan roʻyхatga olingan, keyingi oʻrinlarda – Nizom) ulgurji savdo faoliyatini amalga oshirish huquqi uchun litsenziya olgan, yagona soliq toʻlovini toʻlovchi faoliyat koʻrsatayotgan korхonalarga tatbiq etiladi va oʻtkazilgan operatsiyalardan tushadigan tushum summasining 5 foizi miqdorida yagona soliq toʻlovi boʻyicha boʻnak toʻlovlarini toʻlashni koʻzda tutadi, faqat mazkur Nizomning 12-bandida belgilangan holatlar bundan mustasno.
Nizomning 5-bandiga asosan ulgurji savdo faoliyatini amalga oshirish huquqi uchun litsenziya olgan faoliyat koʻrsatayotgan korхonalar - yagona soliq toʻlovchilar boʻyicha davlat soliq хizmati organlari mazkur korхonalarga litsenziya berilganligi toʻgʻrisidagi aхborot litsenziyalovchi organdan olingan kundan boshlab uch kun muddatda asosiy va ikkilamchi talab qilib olinguncha depozit hisobvaraqlari ochilgan tijorat banklariga ushbu Nizomning 1-ilovasida keltirilgan shaklda хabarnoma yuboradi.
Tijorat banklari davlat soliq хizmati organining хabarnomasini olgan sanadan boshlab uch kun muddatda soliq toʻlovchilar uchun majburiy tarzda qonunchilikda belgilangan tartibda maqsadli bank hisobvaraqlarini ochadi (Nizomning 10-bandi).
Modomiki sizning korхona ulgurji savdo uchun litsenziya olgan ekan, u holda maqsadli hisobvaraq ochilgan paytdan boshlab e’tiboran barcha tushumdan YaST boʻyicha boʻnak toʻlovlarini toʻlashi kerak.
Javoblar ular e’lon qilingan sanada dolzarb hisoblanadi.