“Улгуржи савдо корхоналари томонидан ягона солиқ тўловини бўнак тўловларини ҳисобга  олган ҳолда тўлаш тартиби тўғрисидаги Низом”  (14.01.2015 йилда 2065-сон билан рўйхатга олинган, кейинги ўринларда – Низом) улгуржи савдо фаолиятини амалга ошириш ҳуқуқи учун  лицензия олган, ягона солиқ тўловини тўловчи фаолият кўрсатаётган  корхоналарга татбиқ этилади ва ўтказилган операциялардан тушадиган тушум суммасининг 5 фоизи миқдорида ягона солиқ тўлови бўйича бўнак тўловларини тўлашни кўзда тутади, фақат мазкур Низомнинг 12-бандида белгиланган ҳолатлар бундан мустасно.

Низомнинг 5-бандига асосан улгуржи савдо фаолиятини амалга ошириш ҳуқуқи учун лицензия олган фаолият кўрсатаётган корхоналар - ягона солиқ тўловчилар бўйича давлат солиқ хизмати органлари мазкур корхоналарга лицензия берилганлиги тўғрисидаги ахборот лицензияловчи органдан олинган кундан бошлаб уч кун муддатда асосий ва иккиламчи талаб қилиб олингунча депозит ҳисобварақлари очилган тижорат банкларига ушбу Низомнинг 1-иловасида келтирилган шаклда хабарнома юборади.

Тижорат банклари давлат солиқ хизмати органининг хабарномасини олган санадан бошлаб уч кун муддатда солиқ тўловчилар учун мажбурий тарзда қонунчиликда белгиланган тартибда мақсадли банк ҳисобварақларини очади (Низомнинг 10-банди).

Модомики сизнинг корхона улгуржи савдо учун лицензия олган экан, у ҳолда мақсадли ҳисобварақ очилган пайтдан бошлаб эътиборан барча тушумдан ЯСТ бўйича бўнак тўловларини тўлаши керак.