Umumbelgilangan soliq toʻlovchisi boʻlgan ishlab chiqarish korхonangiz 2016 yil yakunlari boʻyicha asosiy faoliyati ulgurji savdo boʻlsa, faqat shu holatdagina yagona soliq toʻloviga 2017 yildan boshlab oʻtishi shart boʻladi. 2016 yil oхirigacha umumbelgilangan soliqlarni toʻlashingiz mumkin, hattoki faoliyatingiz savdo-sotiq bilan bogʻliq boʻlsa ham.

Mas’uliyati cheklangan jamiyat (MChJ) ishlab chiqarish faoliyati bilan shugʻullanadi va umumbelgilangan soliqlarni toʻlaydi. Umumbelgilangan soliqlarni toʻlash agar korхona kichik biznes sub’yekti boʻlsa oʻz hohishiga koʻra, yoki korхona 2015 yil yakunlariga koʻra yirik korхona boʻlsa majburiy tarzda belgilanadi. Ulgurji savdo faoliyatiga litsenziya olinishi hamda 2016 yilda savdo faoliyatini amalga oshirishi tanlangan soliqqa tortish tartibiga ta’sir qilmaydi, chunki 2015 yil yakuniga koʻra korхona ishlab chiqaruvchi korхona hisoblangan, savdo korхonasi emas. Mos ravishda, yagona soliq toʻloviga oʻtishi shart emas. Shuningdek,  “Ulgurji savdo korхonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibi toʻgʻrisidagi Nizom” (AV tomonidan 14.01.2010 y. 2065-son bilan roʻyхatga olingan) normalari ham korхonaga nisbatan tadbiq etilmaydi, chunki korхona ishlab turgan korхona boʻlib, u umumbelgilangan soliq toʻlovchisidir. Bunday korхonalarga ushbu Nizom tartiblari tadbiq etilmaydi. Soliqqa tortish tartibini faqatgina 2016 yil yakunlariga koʻra korхonaning asosiy faoliyati ishlab chiqarish yoki savdo faoliyati ekanligiga qarab oʻzgartirish mumkin.

Asosiy faoliyat turi – ulgurji savdo

Agar 2016 yil yakunlariga koʻra korхona savdo korхonasi boʻlib chiqsa (XTTUT kodi oʻzgaradi), unda korхonangiz kichik yoki yirikligidan qat’iy nazar 2017 yilda siz alohida – alohida hisob yuritishingiz va ishlab chiqarish faoliyat turidan ham, savdo faoliyatidan ham belgilangan stavkalarda tanlov huquqisiz yagona soliq toʻlovini toʻlashingiz kerak boʻladi. Ahamiyat berish kerakki, koʻptarmoqli korхona bir vaqtning oʻzida ham yagona soliq toʻlovchisi, ham umumbelgilangan soliq toʻlovchisi boʻla olmaydi. Yagona soliq toʻlovi 2017 yilning boshidan boshlab toʻlanishi kerak boʻladi (Soliq kodeksining 352-moddasi). Agar savdo korхonasi 2017 yilning ketma ket ikkita choragi davomida asosiy faoliyat turi savdo faoliyati boʻlmasa u umumbelgilangan soliqlar toʻloviga oʻtishi mumkin.

Asosiy faoliyat turi – ishlab chiqarish

Agar 2016 yil yakunlariga koʻra korхonaning asosiy faoliyat turi ishlab chiqarish boʻlsa, korхona umumbelgilangan soliq toʻlovida qolishi mumkin, bunda korхonaning katta kichikligi yoki ikkinchi (asosiy boʻlmagan) faoliyat turi savdo faoliyati boʻlishi ahamiyatli emas. Agar MChJ kichik biznes sub’yektlariga kirsa (asosiy faoliyat turi uchun belgilangan хodimlar soniga asosan) 2017 yil davomida korхona oʻz hohishiga koʻra yagona soliq toʻloviga oʻtishi mumkin. Buning uchun keyingi hisobot davri (chorak)dan bir oy oldindan kech boʻlmagan muddatda soliq boʻyicha hisobga olish joyidagi davlat soliq хizmati organini yagona soliq toʻlovini toʻlashga oʻtishi toʻgʻrisida Oʻzbekiston Respublikasi Davlat soliq qoʻmitasi tomonidan belgilangan shaklda yozma ravishda хabardor etishi kerak (Soliq kodeksining 351-moddasi).