Darhaqiqat, Oʻzbekiston Respublikasi Hukumati Bilan Koreya Respublikasi Hukumati oʻrtasida “Ijtimoiy ta’minot toʻgʻrisida”gi Bitim (Prezidentning 09.01.2006y. PQ-254-son qarori bilan tasdiqlangan, keyingi oʻrinlarda – Bitim) qabul qilingan, va 2015 yil 28 mayda unga oʻzgartirishlar kiritilgan.
Kiritilgan oʻzgartirishlarga muvofiq, ish beruvchidan undiriladigan va Oʻzbekiston Respublikasi Agentligiga oʻtkaziladigan yagona ijtimoiy toʻlovlar Koreya Respublikasi fuqarolari mehnat faoliyatidan olinadigan daromadlariga nisbatan belgilanmaydi. Mazkur oʻzgartish u kuchga kirgunga qadar belgilangan, ammo toʻlanmagan yagona ijtimoiy toʻlovlarga nisbatan ham qoʻllaniladi (Bitimning 2-moddasi Oʻzbekiston Respublikasi Hukumati bilan Koreya Respublikasi Hukumati oʻrtasida 2015 yil 28 maydagi notaga asosan ushbu 4-band bilan toʻldirilgan).
Agar Oʻzbekiston Respublikasining хalqaro shartnomasida Oʻzbekiston Respublikasining soliq toʻgʻrisidagi qonun hujjatlarida nazarda tutilganidan boshqacha qoidalar belgilangan boʻlsa, хalqaro shartnoma qoidalari qoʻllaniladi (SKning 4-moddasi).
Shunga koʻra, Koreya Respublikasi fuqarolari mehnat faoliyatidan olinadigan daromadlariga nisbatan yagona ijtimoiy toʻlovlar hisoblanmaydi va toʻlanmaydi.
Javoblar ular e’lon qilingan sanada dolzarb hisoblanadi.