Тавсияномада:

– меҳнат таътиллари кимларга тақдим этилади;

– асосий энг кам таътил;

– асосий узайтирилган таътил;

– қўшимча таътиллар;

– ноқулай меҳнат шароитларидаги иш учун қўшимча таътил;

– ноқулай табиий-иқлимий шароитлардаги иш учун қўшимча таътил;

– битта ташкилотда ёки тармоқда кўп йиллик иш стажи учун қўшимча таътил;

– қонунчиликда назарда тутилган қўшимча таътиллар;

– локал тартибда назарда тутилган қўшимча таътиллар;

– болалари бўлган ходимга қўшимча таътил;

– асосий ва қўшимча меҳнат таътилини жамлаб ҳисоблаш.

Ҳар йилги меҳнат таътили – иш ўрни, лавозими ҳамда ўртача иш ҳақи сақлаб қолинган ҳолда ходим ишдан озод этиладиган давр. Меҳнат таътили ходимга дам олиш ва ишлаш қобилиятини тиклаш учун ҳар йили иш йили давомида берилади  .

Ҳар бир ходимнинг иш йили алоҳида – у меҳнат шартномасига кўра ҳақиқатда иш бошланган санадан эътиборан ҳисоблаб чиқарилади, . Масалан, меҳнат шартномаси 2022 йил 1 майда тузилди, шу куни ходим ишга киришди. Ушбу ходимнинг иш йили – 2022 йил 1 майдан 2023 йил 30 апрелга қадар, агар бу оралиқда ҳар йилги меҳнат таътили учун иш стажига киритилмайдиган даврлар бўлмаган бўлса.

Эслатиб ўтамиз

Иш берувчи ҳам, ходим ҳам тасдиқланган таътиллар жадвалига амал қилишлари шарт ва жадвалга кўра белгиланган таътилга чиқиш вақтини бир томонлама тартибда ўзгартиришга ҳақли эмас. Таътилга кетиш вақтини фақат уларнинг ўзаро келишувига кўра ўзгартириш мумкин, . Таътиллар жадвалини қандай тузиш ва тасдиқлаш ҳақида янада батафсил экспертларнинг тавсияномасида.

Ҳар йилги меҳнат таътилининг икки тури бор, :

• асосий меҳнат таътили - энг кам ёки узайтирилган;
• асосий таътил билан жамлаб ҳисобланадиган қўшимча меҳнат таътили.

Эътибор беринг

Меҳнат шартномасига ходимни ҳар йилги меҳнат таътилини олиш ҳуқуқисиз ишга қабул қилиш тўғрисидаги шартни киритманг. Бундай қоида ходимнинг ҳолатини меҳнат тўғрисидаги қонунчиликка ва меҳнат тўғрисидаги бошқа ҳуқуқий ҳужжатларга нисбатан ёмонлаштиради, демак, у ҳақиқий эмас, .

Вазият

Ҳар йилги таътилни ЯММТда рўйхатдан ўтказиш зарурми?

Ходимларнинг ҳар йилги меҳнат таътилини my.mehnat (ЯММТда) да рўйхатдан ўтказиш керакми? Ахир тизим таътилларнинг айрим турларини расмийлаштириш учун ишлатилади, ва ҳар йилги таътил уларнинг жумласига кирадими йўқми, тўлиқ тушунарли эмас.

Ҳар йилги меҳнат таътилини ЯММТда рўйхатдан ўтказиш керак эмас.

Ҳар йилги меҳнат таътили барча ходимларга, иш жойи ва ўртача иш ҳақи сақланган ҳолда, берилади. Уни расмийлаштириш тартиби МКнинг 227 ва 228-моддалари билан белгиланган. Меҳнат таътилини қандай расмийлаштириш ҳақида батафсил экспертлар тавсияномасида билиб олинг.

Эслатиб ўтамиз

Меҳнат таътили ходимга ҳар йили иш йили давомида берилади.

Иш берувчи таътилни умумий тартибда расмийлаштириши: ходимга таътил бошланиши ҳақида хабар бериши, буйруқ чиқариши ва таътил пулини тўлаши кифоя. Ҳар йилги меҳнат таътилини ЯММТда рўйхатдан ўтказиш қонунчиликда назарда тутилмаган.

ЯММТда меҳнат қонунчилиги билан кафолатланган қуйидаги ижтимоий таътилларни рўйхатдан ўтказадилар:

• ҳомиладорлик ва туғиш бўйича;
• бола парвариши бўйича;
• ўқув таътили;
• ижодий таътиллар.

Таътилларнинг айнан шу турлари бўйича қонунчилик ЯММТ базасида рўйхатдан ўтказишни талаб қилади ҳамда махсус кафолатлар ва компенсацияларни назарда тутади.

Вазият

Агар ходима таътилни рад этаётган бўлса

Ёлғиз она бўлган ходима уч йил давомида раҳбарлик лавозимларида ишлаган ва шу вақт ичида бирор марта меҳнат таътилига чиқмаган. Таътиллар жадвалини у билан келишиб олишнинг иложи бўлмади, чунки у имзо қўйишдан бош тортди. Натижада унга уч йилл учун таътиллар берилмади. Бироқ унинг ўзи ўз ихтиёри билан таътилга чиқишни истамаяпти. Бундай вазиятда иш берувчи қандай йўл тутиши керак ва қандай чоралар кўриш мумкин?

Меҳнат қонунчилиги нормалари, шу жумладан меҳнат таътилларини бериш тартиби ҳам, эгаллаб турган лавозимидан қатъи назар, барча тоифадаги ходимларга татбиқ этилади.

Ҳар йилги меҳнат таътилларини тақдим этмаслик меҳнат қонунчилигида назарда тутилмаган. Таътил ҳар йили, ушбу таътил берилаётган иш йили тугагунига қадар берилиши керак.

Эслатиб ўтамиз

Алоҳида ҳолларда ходимнинг розилиги билан таътилнинг 14 календарь кундан ортиқ бўлган қисми кейинги иш йилига кўчирилиши мумкин. Ва кейинги иш йили давомида ундан албатта фойдаланилиши керак. Таътилнинг қолган кунларини кейинги иш йилига қандай кўчириш ҳақида батафсил тавсияномада билиб олинг

Ҳар йилги таътилларни бериш навбатини таътиллар жадвали белгилайди. Иш берувчи уни касаба уюшмаси қўмитаси ёки ходимларнинг бошқа вакиллик органи билан келишувга кўра ҳар календарь йил бошлангунга қадар тасдиқлайди. Ходиманинг таътиллар жадвали билан танишишни рад этиши таътил бермаслик учун асос бўлмайди.

Агар ходим таътиллар жадвали билан танишиб чиқишга имзо қўйишни рад этса, рад этишни тасдиқловчи далолатномани расмийлаштиринг. Бироқ тасдиқланган таътиллар жадвалининг мажбурий ижроси ўз кучида қолади. Бунда ёлғиз ота-оналарга таътил улар учун қулай бўлган вақтда берилиши мумкин.

Муҳим

Ёлғиз ота ёки она ўзи учун қулай дам олиш вақтини белгилашга ҳақли, лекин ундан бутунлай воз кечишга ҳақли эмас. Иш берувчи иш йили доирасида таътилни расмийлаштириши ва бериши, ходим эса – ундан фойдаланиши шарт.

Кўриб чиқилаётган вазиятда қуйидагиларни тавсия этамиз:

1. Ходимани ҳар йилги меҳнат таътилларини беришга тааллуқли қонун ҳужжатларининг барча нормалари билан таништириш.

2. Ходима билан илгари фойдаланилмаган таътиллардан фойдаланиш тартибини келишиб олиш ва, имкони бўлса, уларни тўлиқ ёки қисман бериш – унинг ёзма аризасига кўра, чунки улар жадвалда назарда тутилмаган.

3. Ҳар бир йил учун таътилларнинг энг кам давомийлигидан (21 календарь кун) ташқари фойдаланилмаган таътил кунлари учун пулли компенсация таклиф этиш.

Мисол

Компенсацияни ҳисоблаш

Ходиманинг меҳнат таътилининг умумий давомийлиги – 25 календарь кун. У ҳар бир меҳнат таътилида 4 календарь кун учун пулли компенсация олиш ҳуқуқига эга.

Таътилнинг 21 календарь кунидан натура шаклида фойдаланиш зарур, қолганлари учун эса пулли компенсация олиш мумкин.

Муҳим

Ижтимоий таътилларнинг барча турлари натура шаклида тақдим этилиши керак.

4. Ходиманинг фойдаланилмаган барча таътилларини таътиллар жадвалига киритиш. Буни, у жадвал билан танишиб чиқишдан бош тортишидан қатъи назар, амалга ошириш зарур. Унинг хоҳишига кўра фақат улардан фойдаланиш вақтини белгилаш мумкин.

Меҳнат таътиллари кимларга тақдим этилади

Ҳар бир ходим меҳнат таътилини олиш ҳуқуқига эга. Бироқ бу ФҲШ асосида ишларни бажарувчиларга тааллуқли эмас. Уларга таътиллар тақдим этилмайди, чунки бу муносабатларга меҳнат тўғрисидаги қонунчилик татбиқ этилмайди .

Ходимларнинг ҳар йилги меҳнат таътилига чиқиш ҳуқуқи иш ўрни, бажарадиган меҳнат вазифаси, иш вақти тартиби, меҳнат шартномасининг муддати ва бошқаларга боғлиқ эмас. Яъни ҳар қандай шартнома турига кўра ва иш кунининг тўлиқ ва нотўлиқ бўлиши ва ҳоказолардан қатъи назар, барча ходимлар меҳнат таътилига чиқиш ҳуқуқига эга.

Умумий асосларда ҳар йилги меҳнат таътилига чиқиш ҳуқуқидан шунингдек:

• ўриндошлар, – ташқи ва ички;
• уй ишчилари;

• ташкилотга иш ўринларининг белгиланган энг кам сони ҳисобига маҳаллий меҳнат органининг йўлланмаси бўйича қабул қилинган ходимлар ва бошқалар фойдаланишади.

Асосий энг кам таътил

Ҳар йилги меҳнат таътилини 21 календарь кунига беринг – бу унинг энг кам давомийлиги .

Энг кам таътил тўғрисидаги қоидани бузганлик учун МЖтК 49-моддасига кўра жавобгарликка тортишлари мумкин. Асосий таътилнинг узоқроқ давомийлигини белгилашга эса йўл қўйилади. Уни жамоа келишувида, жамоа шартномасида, локал ҳужжатда ёки меҳнат шартномасида белгилаш мумкин. У ҳолда бу асосий энг кам эмас, балки асосий узайтирилган таътил бўлади .

Асосий узайтирилган таътил

Узайтирилган таътил МК, норматив-ҳуқуқий ҳужжатлар ёки иш берувчи томонидан локал тартибда белгиланади.

1. МК узайтирилган таътилни МК  белгилайди. Демак, иш берувчи қуйидагиларга узайтирилган таътил бериши шарт:

• 18 ёшгача бўлган шахсларга - 30 календарь кун;
•  I ва II гуруҳ ногиронлиги бўлган ходимларга - 30 календарь кун;
• давлат ҳокимияти ва бошқаруви органлари ходимларига - 27 календарь кун. Бундан ходимларнинг айрим тоифалари учун қонунда асосий узайтирилган таътилнинг узоқроқ давомийлиги белгиланган ҳоллар мустасно;

2. Узайтирилган таътиллар МКдан ташқари меҳнат вазифаларининг ўзига хос жиҳатлари ва хусусиятларига ҳамда бошқа ҳолатларга қараб, норматив-ҳуқуқий ҳужжатлар билан белгиланиши мумкин. Масалан, судьяларга, прокуратура органлари ходимларига, депутатларга ва бошқаларга;   

3. Иш берувчи узайтирилган таътилларни ташкилотда локал тартибда – жамоа келишувлари, жамоа шартномаси, локал ҳужжатлар, меҳнат шартномаси билан ўзи белгилаши мумкин. Ушбу ҳужжатларда иш берувчи таътилнинг муайян давомийлигини кўрсатади.

Узайтирилган таътилни барча ходимларга, шу жумладан ходимларнинг алоҳида тоифалари учун ҳам, масалан, юқори ижтимоий ҳимояга муҳтож ходимлар учун белгилаш мумкин:

• ёлғиз оналарга;
• икки ва ундан кўп боласи бор аёлларга;
• пенсия ёшига етган шахсларга;
• меҳнатда майиб бўлган ходимларга ва бошқаларга.

Шунингдек узайтирилган таътилнинг давомийлигини локал тартибда қонунчиликда кафолатланганига нисбатан кўпайтириш ҳам мумкин.

Қўшимча таътиллар

Қўшимча таътил алоҳида ходимларга асосий энг кам ёки узайтирилган таътилга қўшимча равишда берилади..

Қўшимча таътилларни :

• меҳнат шароитлари ноқулай ишларда банд бўлган ходимларга ;
• ноқулай табиий-иқлим шароитларида иш бажараётган ходимларга ;
• битта ташкилотда ёки тармоқда кўп йиллик иш стажига эга бўлган ходимларга беринг.

Қўшимча таътиллар МКдан ташқари:

• норматив-ҳуқуқий ҳужжатлар билан;
• локал тартибда – жамоа келишувлари, жамоа шартномаси, локал ҳужжатлар, меҳнат шартномаси билан белгиланиши мумкин.

Ноқулай меҳнат шароитларидаги иш учун қўшимча таътил

Бундай қўшимча таътилни меҳнат жараёнида соғлиқ учун зарарли бўлган табиий, кимёвий, биологик ва бошқа ишлаб чиқариш омиллари таъсирига дучор бўладиган ходимларга тақдим этинг.

Ноқулай меҳнат шароитлари муносабати билан қўшимча таътил берилиши лозим бўлган ишлар, касблар, лавозимлар рўйхати иш ўринларидаги меҳнат шароитларини аттестациядан ўтказиш натижаларига кўра белгиланади. Шунингдек бундай таътилнинг аниқ давомийлиги, уни тақдим этиш тартиби ва шартлари белгиланади.

Аттестацияни иш берувчининг ўзи ташкил қилади. Бунинг учун хизматлар кўрсатиш шартномаси бўйича ихтисослаштирилган компанияларни жалб қилиш мумкин, Низом, 15.09.2014 йилдаги ВМҚ-263-сон қарорга 1-илова.

Иш ўринларини атттестациядан ўтказиш натижаларига кўра белгиланган рўйхат ва қўшимча таътилнинг давомийлигини жамоа шартномасида акс эттиринг. Агар компанияда жамоа шартномаси бўлмаса, иш берувчи рўйхатни касаба уюшмаси қўмитаси ёки ходимларнинг бошқа вакиллик органи билан келишган ҳолда тасдиқлайди.

Ноқулай меҳнат шароитларидаги иш учун бериладиган қўшимча таътилнинг энг қисқа давомийлиги, уни бериш шартлари ва тартиби Вазирлар Маҳкамаси томонидан белгиланади  .

Эътибор беринг

Ноқулай меҳнат шароитларидаги иш учун таътилни фақат кўрсатилган шароитларда ҳақиқатда ишлаб берилган вақт учун тақдим этинг 

Ноқулай табиий-иқлим шароитларидаги иш учун ҳар йилги қўшимча таътил  

Бундай таътил олис ҳудудларда меҳнат қилаётган ходимларга тақдим этилади.  Бу қонун чиқарувчи қайси жойларда ишлаганлик учун меҳнат ҳақига тегишли коэффициентлар белгиланган бўлса, ўша жойларга тааллуқлидир .

Ноқулай табиий-иқлим шароитларига эга туманлар рўйхати ҳамда қўшимча таътилнинг энг кам давомийлиги Вазирлар Маҳкамаси томонидан 06.09.2019 йилдаги ВМҚ-743-сон қарор билан тасдиқланган Низомга 1-иловада белгиланган. 

Қўшимча таътил кунларининг сони туман ва жойга қараб 1 кундан 6 кунгача бўлиши мумкин. Кунлар сони иш кунларида кўрсатилган, чунки ушбу ҳужжатга ҳали ўзгартиришлар киритилмаган. 

Иш берувчи шунингдек назарда тутилмаган қўшимча таътилни:

• жамоа келишувларида;
• жамоа шартномасида;
• ташкилотнинг локал ҳужжатларида белгилаши мумкин.

Қўшимча таътилни тўлиқ давомийликда, фақат агар ходим иш йилини тўлиқ ишлаган тақдирда тақдим этинг.

Иш йили тўлиқ ишланмаганда таътилнинг давомийлигини ишлаб берилган вақтга мутаносиб равишда аниқланг. Бунинг учун таътилнинг тўлиқ давомийлигини 12 га бўлинг ва тўлиқ ишланган ойлар сонига кўпайтиринг. Бунда қўшимча таътил кунларининг сони яхлитлаш қоидаларига кўра яхлитланади.

Битта ташкилотда ёки тармоқда кўп йиллик иш стажи учун ҳар йилги қўшимча таътил

Ходимга у битта ташкилотда ёки тармоқда ишлаган ҳар 5 йил учун давомийлиги икки календарь кун бўлган, бироқ жами 8 календарь кундан кўп бўлмаган ҳар йилги қўшимча меҳнат таътили берилади, .

Қонунчилик томонидан ходимларнинг алоҳида тоифаларига иш стажи учун узоқроқ таътиллар назарда тутилади, . Айни вақтда бундай норматив-ҳуқуқий ҳужжат тасдиқланмаган. Шунинг учун кўп йиллик иш стажи учун қўшимча таътилларни ҳозирча барча ходимларга бир хил ҳисобланг.

Аввалги иш жойидаги иш стажини қўшимча таътил учун жорий иш стажига киритиш мумкин, агар бу:

• қонунчиликда;
• жамоа келишувларида;
• жамоа шартномасида;
• иш берувчининг ички ҳужжатларида;
• ходим билан тузилган меҳнат шартномасида назарда тутилган бўлса.

Агар ходим ташкилотга иш берувчининг таклифига кўра ишга қабул қилинган бўлса, қўшимча меҳнат таътилини олиш ҳуқуқини берувчи иш стажига бошқа иш берувчидаги иш стажи ҳам киритилади.

Эътибор беринг

Кўп йиллик иш стажи учун қўшимча таътилларни барча ташкилотлар тақдим этиши керак. Бунда уларнинг мулкчилик шаклининг қандайлиги муҳим эмас. Микрофирмалар бундан мустасно. Микрофирмалар ходимларига бундай таътил, агар бу жамоа келишувларида, меҳнат шартномасида, локал ҳужжатларда ёки меҳнат шартномасида белгиланган бўлса, берилади, 

Қонунчиликда назарда тутилган ҳар йилги қўшимча таътиллар

Қўшимча таътилларни тақдим этишни МК ташқари бошқа норматив-ҳуқуқий ҳужжатлар ҳам белгилайди. Демак, қуйидагилар қўшимча таътил олиш ҳуқуқига эга:

• ядро полигонларида ва бошқа ядровий-радиация объектларида ҳарбий хизматни ўтаган ногиронлиги бўлган пенсионерлар – камида 12 иш куни, 30.05.2002 йилдаги ПФ-3079-сон қарорнинг 2 бандининг 3 хатбошиси. (ушбу қўшимча таътилни тақдим этишни тартибга солувчи ҳужжатга ҳали ўзгартиришлар киритилгани йўқ);
• Чернобиль ҳалокати оқибатида зиён кўрган шахслар – 14 календарь кун,  п.Олий суд пленуми қарори билан тасдиқланган Рўйхатнинг 14 банди ва 06.04.1992 йилдаги ВМҚ-170-сон.

Локал тартибда назарда тутилган ҳар йилги қўшимча таътиллар 

МК ва бошқа норматив-ҳуқуқий ҳужжатларда белгиланган ҳоллардан ташқари, қўшимча таътиллар жамоа келишувларида, жамоа шартномасида, локал ҳужжатда, меҳнат шартномасида назарда тутилиши мумкин. Ходимларни юқори меҳнат кўрсаткичлари учун, шунингдек унвонлар ёки мукофотлар олган ходимларни қўшимча таътил билан рағбатлантириш мумкин.

Мисол учун, корхонанинг жамоа шартномасида юқори меҳнат кўрсаткичлари учун 7 календарь кундан иборат қўшимча таътил назарда тутилган. “Илғор” ходимнинг ҳар йилги асосий меҳнат таътилининг давомийлиги – 21 календарь кун. Унинг таътилининг умумий давомийлиги 28 календарь кунни ташкил қилади (21 + 7).

12 ёшга тўлмаган болаларнинг ёки 16 ёшга тўлмаган ногиронлиги бўлган боланинг ота-онасидан бирига бериладиган ҳар йилги қўшимча таътил

Ушбу таътилни алоҳида таъкидлаш лозим, чунки бу шунингдек ижтимоий таътил ҳисобланади. Болалари бўлган ходимлар – юқори ижтимоий ҳамда ҳуқуқий ҳимояга муҳтож бўлган ходимларнинг алоҳида тоифасидир.

Бундай таътилнинг энг кам давомийлиги – 4 календарь кун, . Ундан ота-онадан бири фойдаланиши мумкин. Одатда – боланинг онаси. Бироқ, агар қўшимча таътил тақдим этишни сўраб боланинг отаси мурожаат қилса, у иш берувчига боланинг онаси ёки оилавий вазифаларни бажариш билан машғул бошқа шахснинг ушбу кафолатдан фойдаланмаётганини тасдиқловчи ҳужжатни тақдим этиши керак. Масалан :

• иш жойидан маълумотнома;
• ўлим тўғрисидаги гувоҳнома;
• она ва оилавий вазифаларни бажариш билан машғул бошқа шахс муомалага лаёқатсиз деб топилганлиги тўғрисидаги қонуний кучга кирган ёки ота-оналик ҳуқуқидан маҳрум қилиш ҳақидаги қонуний кучга кирган суд қарори ва ҳоказо.

Қўшимча таътилни боланинг отасига МК  кўра тақдим этманг, агар:

• болаларнинг онаси ишлаётган ва ушбу кафолатдан фойдаланётган бўлса;
• болаларнинг онаси ишламайдиган ва болаларни парваришлаш билан банд бўлса.

Бундай қўшимча таътилни ҳар йилги меҳнат таътилига қўшиш ёки тўлиқ ёхуд қисмларга бўлган ҳолда ундан алоҳида фойдаланиш мумкин. Таътил даври иш берувчи билан келишилган ҳолда, аммо фақат тегишли иш йили давомида белгиланади. Ушбу таътилни кейинги иш йилига кўчиришга ёки уни пулли компенсация билан алмаштиришга йўл қўйилмайди, чунки у болаларни парвариш қилувчи шахсларга тақдим этиладиган мақсадли таътил .

Ишдан бўшатишда ота-оналарга қўшимча таътил учун компенсация 

12 ёшга тўлмаган икки нафар ва ундан ортиқ боласи бор ходимга бериладиган қўшимча таътил ижтимоий таътиллар жумласига киради. Ундан иш йили давомида фойдаланилиши керак ва ушбу таътилни кейинги иш йилига кўчиришга йўл қўйилмайди.

Бироқ шуни тушуниш муҳимки, бу норма фақат меҳнат шартномаси амал қиладиган даврга татбиқ этилади. Яъни бундай таътилларни кейинги иш йилига кўчириш мумкин эмас, демак, улар ўтган даврлар учун жамғарилмайди.

Агар ходим қўшимча таътилнинг белгиланган 4 кунидан иш даврида фойдаланишга улгурмаган бўлса, ушбу таътилни ишдан бўшатиш чоғида компенсация тўлашда ҳисобга олиш зарур. Таътилнинг ушбу тури учун пулли компенсацияни охирги иш йили учун ишдан бўшатиш санасигача ишланган вақтга мутаносиб равишда ҳисоблаш керак.

Масалан, ходимнинг иш йили – 2024 йилнинг 24 октябридан. Ишдан бўшаш санаси – 2025 йил 10 август. Ушбу қўшимча кунлар учун компенсация 24.10.2024 йилдан 10.08.2024 йилгача бўлган иш даври учун тўлиқ ишланган 10 ой учун қуйидаги формула бўйича ҳисобланиши керак: 4 : 12 х 10 = 3, 3 календарь кун (МК 224-моддаси қоидаларига мувофиқ яхлитлаймиз → компенсациянинг 3 календарь куни).

Муҳим

Қўшимча таътил кунларидан боланинг онаси ҳам, отаси ҳам фойдаланиши мумкин. Бироқ бундай таътилни расмийлаштиришда иш берувчи ота-онадан бири ушбу кафолатдан фойдаланмаётганлигини текшириши керак

Меҳнат шартномаси бекор қилинганда ходимга асосий таътил учун компенсацияга жорий ва ўтган иш йилларидаги фойдаланилмаган кунлар ҳам киритилиши мумкин. Бу ишдан бўшатишдаги компенсацияларга оид умумий қоида. 401-модда МК бўйича қўшимча таътил учун компенсация фақат охирги иш йили учун берилади.

Шундай қилиб, 12 ёшга тўлмаган икки нафар фарзанди бор ходимни ишдан бўшатишда таътил учун компенсация икки қисмга бўлиб ҳисобланиши керак:

1. Фойдаланилмаган барча асосий таътиллар учун (эҳтимол, олдинги даврлар киритилган ҳолда).
2. МКнинг 401-моддаси бўйича қўшимча таътил учун – охирги иш йилида ишланган вақтга мутаносиб равишда.

Олинган суммалар жамланади ва якуний ҳисоб-китобда тўланади. Ишдан бўшатишда ходим билан ҳисоб-китоб нималарни ўз ичига олиши ҳақида батафсил – тавсияномада

Асосий ва қўшимча меҳнат таътилини жамлаб ҳисоблаш 

Ҳар йилги меҳнат таътилининг умумий давомийлиги ҳар йилги асосий – энг кам ёки узайтирилган таътил ва қўшимча таътиллар қўшиб жамлаган ҳолда ҳисоблаб чиқарилади.

Қонунчилик билан белгиланган таътилларнинг умумий давомийлиги 56 календарь кундан ошиб кетиши мумкин эмас, . Бу чеклов қонунчиликда назарда тутилмаган, балки:

• жамоа келишувларида;
• жамоа шартномасида;
• иш берувчининг касаба уюшмаси қўмитаси билан келишувга кўра қабул қилинган ички ҳужжатларида;
• меҳнат шартномасида белгиланган меҳнат таътилларига нисбатан татбиқ этилмайди.