Ҳа, сизнинг меҳнат дафтарчангизга корхонада 3 ой мобайнида ишлаганингиз тўғрисидаги маълумотларни  киритишлари юзасидан ҳуқуққа эгасиз. Бундан ташқари бу Сизнинг иш берувчингизнинг  мажбуриятидир.

      Меҳнат кодексининг (кейинги ўринларда – МК) 81-моддаси иккинчи қисмига ва Меҳнат дафтарчаларини юритиш тартиби тўғрисида йўриқноманинг (АВ томонидан 29.01.1998 йилда 402-сон билан рўйхатдан ўтказилган) 1.1-бандига мувофиқ иш берувчи мулкчилик ва хўжалик юритиш шаклидан қатъи назар корхонада 5 кундан ортиқ ишлаган барча ходимларга меҳнат дафтарчасини тутиши шарт, ўриндошлик асосида ишловчилар бундан мустасно. Меҳнат дафтарчасига ишга қабул қилиш, бошқа доимий ишга ўтказиш ва меҳнат шартномасини бекор қилиш тўғрисидаги маълумотлар ёзилади, бунда меҳнат шартномасини бекор қилиш асослари (сабаблари) меҳнат дафтарчасига ёзилмайди (МКнинг 81-моддаси учинчи қисми).

    Бироқ Сиз иш берувчи томонидан Сизнинг ишингиз тўғрисидаги маълумотлар ёзилмаганлиги сабабларини билиб олишингиз лозим. Эҳтимол Сизни фуқаролик-ҳуқуқий тусдаги шартномага (меҳнат келишуви) асосан ишга қабул қилишгандир. Меҳнат келишувига асосан иш Фуқаролик кодекси (37, 38 боблар) билан тартибга солинади. Меҳнат келишуви бўйича муносабатлар фақат фуқаролик-ҳуқуқий тусга эгалигини ва ўзида қандайдир меҳнат муносабатлари вужудга келишини кўзда тутмаслигини инобатга олиб,  мазкур ҳолатда ходимнинг меҳнат дафтарчасига ташкилотда ишланган давр тўғрисидаги маълумотларни ёзиш мажбурияти иш берувчида вужудга келмайди.