Касаба уюшмаси аъзолик бадалини тўлаш учун тегишли ташкилот ходимларининг ташкилот раҳбари номига ўзларининг ойлик маошларидан мазкур бадалларни ушлаб қолиш тўғрисидаги аризалари мавжуд бўлиши лозим, бундан ташқари ҳар бир ташкилотнинг жамоа шартномасида мазкур бадаларни ушбу ташкилотнинг бухгалтерияси орқали тўланиши лозимлиги қоида тариқасида белгиланган бўлади.
Демак, сизнинг ҳолатингизда ходимларнинг аъзолик бадалини ўз ойлик маошларидан ушлаб қолиш тўғрисида ташкилот раҳбари номига ёзилган аризалари мавжуд бўлиб, ҳамда ушлаб қолинган маблағлар касаба уюшмасига ўтказиб берилмаётган бўлса, сиз ушбу ташкилот жамоа шартномаси билан танишиб чиқишингиз лозим одатда жамоат шартномасида мазкур бадалар ушбу ташкилотнинг бухгалтерияси орқали тўланиши лозимлиги белгиланади. Агарда жамоат шартномасида кўрсатилган норма мавжуд бўлиб, уни ижроси таъминланмаётган бўлса, қонун ҳужжатларида тегишли жавобгарлик чоралари белгиланган.
Ўзбекистон Республикаси Меҳнат кодексининг 34-моддасига асосан жамоа шартномаси мажбуриятларини бузганлик ва бажармаганлик учун. Касаба уюшмаси, ходимларнинг бошқа вакиллик органи талабига кўра мулкдор ёки у вакил қилган шахс жамоа шартномаси мажбуриятлари бузилишида ёки бажарилмаслигида айбдор бўлган раҳбарга нисбатан қонун ҳужжатларида назарда тутилган чораларни кўриши шартлиги ўрнатилган.
Юқорида назарда тутилган ҳаракатлар (ҳаракатсизликлар) меҳнат тўғрисидаги қонун ҳужжатларининг бузилиши тариқасида баҳоланиши ва МЖТКнинг 49-моддасига асосан энг кам иш ҳақининг икки бараваридан беш бараваригача миқдорда жарима солишга сабаб бўлиши белгиланган.
Шу билан бирга Меҳнат кодексининг 46-моддасига асосан жамоа шартномасида назарда тутилган мажбуриятларнинг бажарилишини тарафларнинг вакиллари, меҳнат жамоаси, шунингдек Ўзбекистон Республикаси Меҳнат вазирлигининг тегишли органлари текшириб боришлари назарда тутилган.
Жамоа шартномасини имзолаган шахслар ҳар йили ёки шартноманинг ўзида махсус кўрсатилган муддатларда мажбуриятларнинг бажарилиши ҳақида меҳнат жамоасининг умумий мажлисида (конференциясида) ҳисобот бериб туришлари ҳамда текшириш олиб бориш вақтида тарафлар ўзларидаги бунинг учун зарур бўлган барча маълумотларни тақдим этишлари шартлиги ўрнатилган (ЎзР МК 46-модда).
Сиз кўтарган масала меҳнат қонунчилигини бузилиши деб баҳоланадиган бўлса, Меҳнат кодексининг 46-моддасига асосланиб, сиз Меҳнат вазирлигининг тегишли ҳудудий инспекциясига тегишли чора кўришни сўраб, мурожаат қилишингиз мақсадга мувофиқ.
Жавоблар улар эълон қилинган санада долзарб ҳисобланади.