Болани икки ёшга тўлгунгача парвариш қилиш бўйича нафақа (кейинги ўринларда – нафақа) тайинлаш ва тўлаш тартиби АВ томонидан 2002 йил 14 мартда 1113-сон билан рўйхатга олинган Низом билан белгиланган. Айтиб ўтиш жоизки, ушбу Низом бюджет соҳасида ишловчи оналарга татбиқ этилмайди.
Саволингиздан аён бўлдики, А корхонаси ажратиб чиқариш шаклида қайта ташкил этилиши натижасида, макарон ишлаб чиқариш цехи алоҳида юридик шахс (кейинги ўринларда - В корхонаси) сифатида ташкил этилган. МКнинг 98-моддасига кўра, корхона мулкдори алмашганда, худди шунингдек корхона қайта ташкил этилганда (қўшиб юборилган, бирлаштирилган, бўлиб юборилган, қайта тузилган, ажратилганда) меҳнат муносабатлари ходимнинг розилиги билан давом этаверади. Саволингизда ҳозирги кунда қайси юридик шахс билан меҳнат муносабатларингиз давом этилаётганлиги ҳақида маълумот бермагансиз. Агарда, Сиз билан тузилган меҳнат шартномасида иш жойи А корхонаси белгиланган бўлса, демак Сизга нафақани А корхонаси тўлаши лозим, чунки нафақа иш жойидан тайинланади ва тўланади. Сиз ва А корхонаси ўртасида тузилган меҳнат шартномасига қўшимча келишув билан ўзгартириш киритилиб, иш жойингиз А корхонасидан В корхонасига алмаштирилган бўлса, иш берувчи - В корхонаси ҳисобланганлиги боис нафақа ушбу корхона томонидан берилади.
Жавоблар улар эълон қилинган санада долзарб ҳисобланади.