Ходимларга меҳнат таътиллари берилиши асосий қоидалари Меҳнат Кодексининг 2-боби билан тартибга солинади.

Ходимларнинг йиллик асосий таътилининг муддати 15 (ўн беш) иш кунидан кам бўлмаслиги белгиланган (МКнинг 134-м.). Шу қаторда, ходим ва корхона ўртасида тузиладиган меҳнат шартномасининг шартларида узайтирилган йиллик таътиллар бериш назарда тутилиши мумкин, айтайлик, ушбу узайтирилган йиллик таътилнинг муддати 9 (тўққиз) иш куни деб белгиланган (МКнинг 135-м.), бундан келиб чиққан холда, меҳнат шартномаси шартлари бўйича ходимнинг умумий таътил муддати 24 (йигирма тўрт) иш куни.

Саволда келтирилган вазиятни ҳисобга олган холда, агар ходим меҳнат муносабатлари бекор қилинаётган санага қадар 24 (йигирма тўрт) иш кунлик таътил муддатидан 20 (йигирма) иш кунлик таътил муддатидан фойдаланган бўлса, қолган (фойдаланилмаган) 4 (тўрт) иш кунлик таътил муддати учун пуллик компенсация тўланади (МКнинг 134-м.).

Таътил муддати ҳар бир тўлиқ таътил миқдорини ўн иккига бўлиб, сўнг тўлиқ ишланган ойлар сонига кўпайтириш йўли билан аниқланади. Бунда ўн беш календарь кунга тенг ва ундан кўп бўлган кунлар бир ой деб яхлитланади, ўн беш календарь кундан ками эса чиқариб ташланади (МКнинг 141-м.).