Ҳозирги вақтда фақат меҳнат шартномаси бўйича ишловчи барча ходимларга тааллуқли бўлган иш ҳақининг энг кам миқдори, шунингдек, бюджет ҳисобидан молиявий таъминланадиган муассаса ва ташкилотларнинг ҳамда давлат корҳоналарининг ҳодимлари меҳнатига ҳақ тўлашнинг энг кам даражасини қонун ҳужжатлари билан белгиланади (МКнинг 153-м. 3-қ.). Бошқа барча корхоналарда меҳнат ҳақи шакли ва тизимлари, мукофотлар, қўшимча тўловлар, устамалар, рағбатлантириш тарзидаги тўловлар жамоа шартномаларида, шунингдек, иш берувчи томоиндан ходимларнинг вакиллик органи билан келишиб қабул қилинадиган бошқа локал ҳужжатларда белгиланади (МКнинг 153-м. 2-қ.). Шу боис корхонада белгиланган тариф ставкалари (окладлар) ва бошқа пул тўловларининг миқдорига қизиққан ходимлар уларни корхонада амалда бўлган тегишли локал ҳужжатлардан билиб олишлари мумкин. Уларда белгиланган миқдор доирасида конкрет меҳнат ҳақи иш берувчи ва ходим ўртасидаги келишув бўйича меҳнат шартномасида белгиланади.
МКнинг 180-моддаси 4-қисмида иш ҳақи, мукофотлар, қўшимча тўловлар, устамалар ва меҳнат ҳақи тизимида назарда тутилган бошқа тўловлар рағбатлантириш турларига кирмаслиги таъкидланган.
Шу билан биргаликда, интизомий жазо амал қилиб турган муддат мобайнида (МКнинг 183-м.) ходимга нисбатан рағбатлантириш чоралари қўлланилмайди.
Ушбу тўловларни ажратиб олишингиз учун корхонангизнинг локал ҳужжатларини яна бир бор ўрганиб чиқишингиз мақсадга мувофиқдир.
Жавоблар улар эълон қилинган санада долзарб ҳисобланади.