2025 йил 17 сентябрда корхона жисмоний шахс билан электрон ҳужжат айланиши дастурий таъминотини қўллаб-қувватлаш бўйича хизматлар кўрсатиш шартномасини тузди. Унда жисмоний шахснинг солиқ органларида ўзини ўзи банд қилган шахс сифатида рўйхатдан ўтганлиги ва кўрсатилган хизматлар учун тўлов Солиқ кодексининг 369-моддаси 9-бандига асосан тўлов манбаида ЖШДС ушлаб қолинмасдан амалга оширилиши кўрсатилган. Шу билан бирга, "Ўзини ўзи банд қилган шахс сифатида фаолиятни амалга ошириш тартиби тўғрисида"ги Низомнинг 6-бандида (Ўзбекистон Республикаси Вазирлар Маҳкамасининг 2020 йил 23 декабрдаги 806-сон қарорига 1-илова) ташкилотлар ўзини ўзи банд қилган шахсларни фақат бир марталик хизматлар кўрсатиш ёки ишларни бажариш учун жалб қилиши мумкинлиги кўрсатилган. Шартнома доирасида 2025 йил 30 сентябрдан бошлаб кўрсатилган хизматлар далолатномаси асосида жисмоний шахсга Солиқ кодексининг 369-моддаси 9-бандига мувофиқ ЖШДС бўйича имтиёзни қўллаган ҳолда тўлов амалга оширилди.