Келинг, тартиб билан муҳокама қиламиз.

Ўриндошлик асосида ишлаш – бу ходимнинг ўзининг асосий ишини бажаришидан ташқари асосий ишидан бўш вақтида меҳнат шартномаси асосида бошқа ҳақ тўланадиган ишни бажаришидир. Ички ўриндошлик бу асосий иш жойида ўриндошлик асосида ишлашдир. Ходимнинг асосий иш жойи ҳисобланган ташкилотда ўриндошлик асосида ишлашга вақтинча бўлмаган ходимнинг ишини бажаришда ёки бўш лавозимдаги ишни бажаришда йўл қўйилади (Ўриндошлик асосида ҳамда бир неча касбда ва лавозимда ишлаш тартиби тўғрисида низомнинг 2 ва 5-бандлари[1]).

Ўриндошлик асосида ишга қабул қилишда ходим билан меҳнат шартномаси тузилади. Меҳнат кодексининг 133-моддасига асосан барча ходимларга, шу жумладан ўриндошлик асосида ишлаётган ходимларга йиллик меҳнат таътиллари берилади. Ўриндошлик асосида ишлаётганларга меҳнат таътили асосий иш жойидаги таътил билан бир вақтда, ўриндошлик асосида ишлаган вақтига мутаносиб равишда ҳақ тўлаган ҳолда берилади (Меҳнат кодексининг 143-моддаси иккинчи қисми). Агар ўриндошлик асосида ишлашнинг биринчи иш йилида ходим олти ойдан кам ишлаган бўлса, у ҳолда ўриндошлик асосидаги ишда таътил учун ишланган вақтга пропорционал ҳақ тўланади (Низомнинг 16-банди иккинчи хатбошиси).

Меҳнат шартномасини бекор қилишда ходимга барча фойдаланилмаган таътиллар учун компенсация тўланади. Компенсация миқдори ходим томонидан фойдаланилмаган таътил кунлари сонидан келиб чиқиб тўланади. Таътиллар муддатини ишланган вақтга мутаносиб равишда ҳисоблаб чиқаришда уларнинг муддати ҳар бир тўлиқ таътил миқдорини ўн иккига бўлиб, сўнг тўлиқ ишланган ойлар сонига кўпайтириш йўли билан аниқланади. Бунда ўн беш календарь кунга тенг ва ундан кўп бўлган кунлар бир ой деб яхлитланади, ўн беш календарь кундан ками эса чиқариб ташланади.

[1] ЎзР ВМнинг 18.10.2012 йилдаги 297-сон Қарорига илова