Хизматлар таннархини юритиш нафақат бухгалтерия ҳисобини тўғри олиб бориш мақсадида, балки унинг солиқ оқибатлари мавжудлиги нуқтаи назаридан ҳам зарурдир.

Таннархнинг бухгалтерия ҳисоби

Хизматлар таннархининг ҳисобини Маҳсулот (ишлар, хизматлар)ни ишлаб чиқариш ва сотиш харажатларининг таркиби ҳамда молиявий натижаларни шакллантириш тартиби тўғрисидаги Низомга мувофиқ юритиш керак (ВМнинг 05.02.1999 й. 54-сонли қарорига илова, кейинги ўринларда - Низом).

Низомда корхонанинг молия-хўжалик фаолияти билан боғлиқ харажатлар рўйхати, ҳамда молиявий натижани шакллантиришда уларни гуруҳлаш, жумладан, таннарх харажатлари гуруҳига кирувчи харажатлар рўйхати ҳам келтирилган (Низомнинг 1-бўлими).

Маҳсулот (ишлар, хизматлар) ишлаб чиқариш таннархига бевосита маҳсулот (ишлар, хизматлар)ни ишлаб чиқариш билан боғлиқ бўлган, ишлаб чиқариш технологияси ва уни ташкил этиш билан шартланган харажатлар киритилади. Уларга қуйидагилар тегишли бўлади: бевосита ва билвосита моддий харажатлар, бевосита ва билвосита меҳнат харажатлари, бошқа бевосита ва билвосита харажатлар, шу жумладан, ишлаб чиқариш хусусиятига эга бўлган устама харажатлар.

Хизматларнинг таннархи 2010 «Асосий ишлаб чиқариш» ёки 2310 «Ёрдамчи ишлаб чиқариш» счётларда шаклланади ва хизматлар реализация қилингандан сўнг 9130 «Бажарилган иш ва кўрсатилган хизматларнинг таннархи» счетнинг дебетига ўтказилади.

Ҳисобот даврининг охирида 9130 счёт 9910 ”Якуний молиявий натижа” счётига ҳисобдан чиқарилади.

Солиқ оқибати

2017 йил 1 январдан эътиборан киритилган ўзгаришларга кўра, товарлар билан бир қаторда ишлар, хизматлар таннархидан ёки олиш баҳосидан паст баҳоларда реализация қилинса, ёки текинга берилса, ЯСТ учун солиқ солиш объекти сифатида товарларнинг, ишларнинг, хизматларнинг таннархи ёки уларни олиш баҳоси (товарни олиш билан боғлиқ харажатларни ҳисобга олган ҳолда) қаралади (СК 355-моддаси).

Шунинг учун солиқ солиш мақсадида хизматларнинг реализация қилиш қиймати унинг ҳақиқий таннархи билан солиштирилади. Қайси сумма катта бўлса, ўша суммадан ЯСТ тўланади.